বঙাইগাঁৱত চুৰি মটৰচাইকেলসহ ২ চোৰ আটক : জে'ললৈ প্ৰেৰণ

বঙাইগাঁৱত চুৰি মটৰচাইকেলসহ দুটা চোৰক আৰক্ষীয়ে আটক কৰিবলৈ সক্ষম হয় ৷ ধৃত চোৰ দুটা কোকৰাঝাৰ জিলাৰ কাজিগাঁও থানাৰ অন্তৰ্গত আলমগঞ্জ তৃতীয় খণ্ডৰ নূৰ হুছেইন ওৰফে চুটকী আৰু ধুবুৰী জিলাৰ গৌৰীপুৰ থানাৰ অন্তৰ্গত আলমগঞ্জৰ আবু ছামা শ্বেখ ৷

আৰক্ষীয়ে চোৰ দুটাৰ পৰা এ এছ-১৯ ডি-৯৪৪৮ নম্বৰৰ পালছাৰ মটৰচাইকেল এখনো জব্দ কৰে ৷ অৱশ্যে মটৰচাইকেলখনত ব্যৱহাৰ কৰা নম্বৰ প্লেটখন ভুৱা বুলি আৰক্ষীয়ে সন্দেহ কৰিছে ৷

আৰক্ষীয়ে জানিব দিয়া মতে, চোৰ দুটাই দেওবাৰে চুৰি মটৰচাইকেল এখন লৈ বঙাইগাঁও চহৰৰ বৰপাৰাৰ দিশে গৈ থকা বুলি গোপন খবৰ লাভ কৰে ৷ পিচত লগে লগে আৰক্ষীয়ে বৰপাৰা বাছষ্টেণ্ডৰ ওচৰত উপস্থিত হৈ চোৰ দুটাক কৰায়ত্ত কৰাৰ লগতে চোৰ দুটাৰ পৰা চুৰি পালছাৰ মটৰচাইকেলখন জব্দ কৰে ৷

আৰক্ষীয়ে চোৰ দুটাই মটৰচাইকেলখন কাৰোবাক বিক্ৰী কৰাৰ বাবে বঙাইগাঁৱলৈ আহিছিল বুলি সন্দেহ কৰিছে ৷ ইপিনে আৰক্ষীয়ে ধৃত চোৰ দুটাক আজি আদালতত হাজিৰ কৰোৱাত আদালতে দুয়োকে জে'ল হাজতলৈ প্ৰেৰণ কৰে ৷