ডবকাৰ মদাৰতলিত অৱসৰপ্ৰাপ্ত শিক্ষকক ৰাজহুৱা সম্বৰ্ধনা

ডবকাৰ পৰা জমিৰ উদ্দিন তালুকদাৰ

এজাক ছাত্ৰ-ছাত্ৰী আৰু জনতাৰ উষ্ম অভিবাদনৰ মাজত চাকৰিৰ পৰা অৱসৰ ল'লে এগৰাকী শিক্ষকে ৷ ডবকাৰ কাষৰীয়া মদাৰতলি অঞ্চলত উচ্চ শিক্ষাৰ প্ৰসাৰৰ বাবে শিক্ষানুষ্ঠানৰ জন্ম দিয়াত অহোপুৰুষাৰ্থ কৰা শিক্ষকগৰাকীক আজি এক আৱেগিক পৰিৱেশত বিদায় সম্বৰ্ধনা জনালে স্থানীয় ৰাইজ আৰু শিক্ষক-কৰ্মচাৰীয়ে ৷

ডবকাৰ সমীপৱৰ্তী মদাৰতলি হাইস্কুলৰ শিক্ষক চিত্তৰঞ্জন দাসক চাকৰিৰ পৰা অৱসৰ গ্ৰহণ উপলক্ষে বিদ্যালয়খনৰ খেলপথাৰত আয়োজিত এক গাম্ভীৰ্যপূৰ্ণ অনুষ্ঠানত ৰাজহুৱা বিদায় সম্বৰ্ধনা প্ৰদান কৰা হয় ৷

মদাৰতলি হাইস্কুল পৰিচালনা সমিতিৰ সভাপতি ৰাজেন কুমাৰ মেচৰ পৌৰোহিত্যত অনুষ্ঠিত সভাখনত সদ্য বিদায়ী শিক্ষকগৰাকীক ৰাজহুৱা সম্বৰ্ধনা প্ৰদান কৰাৰ লগতে ইতিমধ্যে শিক্ষকতাৰ দৰে পৱিত্ৰ বৃত্তিৰ পৰা অৱসৰ গ্ৰহণ কৰা আৰু কে'বাগৰাকী শিক্ষক-কৰ্মচাৰীক বিদায় সম্বৰ্ধনা জ্ঞাপন কৰা হয় ৷

সম্বৰ্ধনা অনুষ্ঠাত বিদায়ী শিক্ষক চিত্তৰঞ্জন দাসক এখনি মানপত্ৰ, শৰাই, জাপি, বস্ত্ৰ, ছাতি, ভাগৱত গীতা, ধূতি, গলবস্ত্ৰৰ লগতে বিভিন্ন ধৰণৰ উপহাৰেৰে সম্বৰ্ধনা প্ৰদান কৰা হয় ৷

এই সম্বৰ্ধনা অনুষ্ঠানত এক আৱেগিক পৰিৱেশে বিৰাজ কৰে ৷ ছাত্ৰ-ছাত্ৰীয়ে প্ৰিয় শিক্ষকগৰাকীৰ চাকৰিৰ পৰা বিদায় উপলক্ষে অনুষ্ঠিত সভাখনত কান্দি কান্দি বিদায় জনায় ৷

সভাখনত ইতিমধ্যে অৱসৰ লোৱা শিক্ষক ক্ৰমে পোনাৰাম গগৈ, বন্তিবালা বৰা গগৈ, যোগেন ডেকা, মায়া দত্ত, হৰিকান্ত বৰাকো সম্বৰ্ধনা জনোৱা হয় ৷ এই অনুষ্ঠানত উপস্থিত থাকে হোজাই জিলা কৰ্মচাৰী পৰিষদৰ সভাপতি জামাল আহমেদ, হোজাই কলেজৰ অৱসৰপ্ৰাপ্ত অধ্যাপক ৰশীদ আহমেদ,

ডবকা হাজী আনফৰ আলী কলেজৰ অধ্যাপক তথা হোজাই জিলা কবি সন্মিলনৰ সভাপতি ডঃ হাছিনুচ চুলতান, হোজাই জিলা হাইস্কুল শিক্ষক সন্থাৰ সভাপতি শিৱ প্ৰসাদ বড়া, ডবকাৰ বি আৰ আম্বেদকাৰ হাইস্কুলৰ প্ৰধান শিক্ষক আব্দুল জলিল পাটোৱাৰী, শিক্ষাবিদ বদৰুল ইছলাম বেগসহ বহু কেইগৰাকী বিশিষ্ট ব্যক্তি ৷ সভাখনৰ আঁতধৰে হাচান আহমেদ বৰভূঞাই ৷