পিষ্টলসহ যুৱক আটকক লৈ ডবকা আৰক্ষী থানাত উত্তপ্ত পৰিস্থিতি

ডবকাৰ পৰা জমিৰ উদ্দিন তালুকদাৰ

হোজাই জিলাৰ ডবকাত মঙলবাৰে নিশা এজন যুৱকক আৰক্ষীয়ে এটি পিষ্টলসহ আটক কৰাক লৈ ব্যাপক প্ৰতিক্ৰিয়াৰ সৃষ্টি কৰিছে ৷ নিৰীহ যুৱকক আৰক্ষী আৰু এটা দালাল চক্ৰই আখেজমূলকভাৱে গ্ৰেপ্তাৰৰ বিৰুদ্ধে ওলাই আহে শতাধিক পুৰুষ-মহিলা ৷

বাতৰি অনুসৰি মঙলবাৰে নিশা ডবকা আৰক্ষী চক্ৰ পৰিদৰ্শক জিয়াউৰ ৰহমানে ডবকা ১০নং ৱাৰ্ডৰ বাসিন্ধা আজাদ হুছেইন নামৰ এজন যুৱকৰ ফাৰ্মাচীৰ পৰা এটি ৭.৬ পিষ্টলসহ আটক কৰি ডবকা থানালৈ লৈ আহে ৷

আজি পুৱাৰ ভাগত এই গ্ৰেপ্তাৰৰ খবৰ পোৱা মাত্ৰকে ৰাইজে ইয়াক ষড়যন্ত্ৰমূলক আখ্যা দি পাঁচ শতাধিক পুৰুষ-মহিলাই ডবকা আৰক্ষী থানা ঘেৰাও কৰি এক উত্তাল প্ৰতিবাদ সাব্যস্ত কৰে ৷

প্ৰতিবাদী ৰাইজৰ অভিযোগ অনুসৰি, ডবকা আৰক্ষী চক্ৰ পৰিদৰ্শকগৰাকীয়ে ডবকাত সক্ৰিয় হৈ থকা এটা দালাল চক্ৰৰ সৈতে মিলি এই যুৱকজনক ষড়যন্ত্ৰৰ বলি সজাইছে ৷

ব্যৱসায়িক সংঘাতৰ বাবে যুৱকজনক বলি সজোৱা বুলিও একাংশ লোকে অভিযোগ কৰে ৷ ইয়াতে ক্ষুব্ধ হৈ একাংশ লোকে ডবকা থানা ঘেৰাও কৰি যুৱকজনক বিনাচৰ্তে মুকলি কৰি দিবলৈ দাবী জনায় ৷ লগতে এই সমগ্ৰ ঘটনাৰ এক ন্যায়িক তদন্তৰো দাবী উত্থাপন কৰে ৷