কলিয়াবৰত মৰিয়া যুৱ ছাত্ৰৰ মৌন সমদল

কলিয়াবৰ পৰা প্ৰদীপ লস্কৰ

কলিয়াবৰত আজি সদৌ অসম মৰিয়া যুৱ ছাত্ৰ সন্থা, কলিয়াবৰ জিলা সমিতিৰ উদ্যোগত এন আৰ চিৰ পৰা কৰ্তন হোৱা পুৰুষ-মহিলাৰ নাম অন্তৰ্ভুক্ত কৰাৰ দাবীত মৌন সমদল উলিয়াই । কুঁৱৰীটোল জয়ন্তীপুৰৰ পৰা প্ৰায় তিনিশতাধিক পুৰুষ-মহিলাই মৌন সমদল কৰি কলিয়াবৰ মহকুমাৰ মহকুমাধিপতি বিতোপন নেওগক এখন স্মাৰক-পত্ৰ প্ৰদান কৰে ।

মৰিয়া যুৱ ছাত্ৰ পৰিষদৰ মুখ্য উপদেষ্টা আলহাজ বদিৰত আলী, সভাপতি মফিজউদ্দিন আহমেদ আৰু সম্পাদক ৰাহুল আহমেদে স্বাক্ষৰিত স্মাৰক-পত্ৰৰ যোগেদি যিসকল প্ৰকৃত নাগৰিকৰ নাম এন আৰ চিৰ পৰা বাদ পৰিছে সেইসকলক এন আৰ চিত নাম অন্তৰ্ভুক্ত কৰাৰ লগতে অধিক সংখ্যক মৰিয়া মহিলাৰ নাম এন আৰ চিৰ পৰা বাদ পৰিছে সেই সকলক জাতিগত প্ৰমাণ-পত্ৰৰ ভিত্তিত অন্তৰ্ভুক্ত কৰাৰ দাবী জনাই মহকুমাধিপতিৰ জৰিয়তে মুখ্যমন্ত্ৰীলৈ স্মাৰক-পত্ৰ প্ৰেৰণ কৰে ।

ইফালে এন আৰ চিত নাম পঞ্জিয়নৰ বাবে প্ৰয়োজনীয় সকলো নথি-পত্ৰ আবেদনৰ লগত গাঠি দিয়াৰ পাছতো তেওঁলোকৰ নাম এন আৰ চিত প্ৰকাশ নোপোৱাৰ  বাবে সংগঠনটোৱে আক্ষেপ প্ৰকাশ কৰাৰ লগতে  বিদেশী বুলি জয়ন্তীপুৰৰ তিনিজন নিৰ্দুষী ব্যক্তিক জেলত সোমোৱাই থোৱা কাৰ্যক তীব্ৰ নিন্দা কৰে ৷ সেইসকলক অতি শীঘ্ৰে জেলৰপৰা মুকলি কৰি দিবৰ বাবে কেন্দ্ৰী চৰকাৰক আৰু ৰাজ্য চৰকাৰক দাবী জনায় ।