বটদ্ৰৱাত বিশ্ব ধঁপাতবিৰোধী দিৱস উদ্‌যাপন : ধঁপাতৰ পৰা হ'ব পৰা ৰোগ সম্পৰ্কে সজাগতা সভা

নগাঁৱৰ পৰা ঋতুপৰ্ণ শৰ্মা

সমগ্ৰ বিশ্বতে আজি উদ্যাপন কৰা হৈছে বিশ্ব ধঁপাতবিৰোধী দিৱস ৷ নগাঁও জিলাৰ বটদ্ৰৱা শিক্ষা খণ্ডৰ অন্তৰ্গত বটদ্ৰৱা মণ্ডল সমল কেন্দ্ৰৰ অধীনৰ বিভিন্ন প্ৰাথমিক আৰু উচ্চ মাধ্যমিক বিদ্যালয়ত পালন কৰা হয় বিশ্ব ধঁপাতবিৰোধী দিৱস ৷ 

বটদ্ৰৱা চৰকাৰী বালিকা নিম্ন বুনিয়াদী বিদ্যালয়, বটদ্ৰৱা বৰভেটী প্ৰাথমিক বিদ্যালয়, বটদ্ৰৱা বৰভেটি মোক্তাৱ, বটদ্ৰৱা চৰকাৰী বালক নিম্ন বুনিয়াদী বিদ্যালয়, বটদ্ৰৱা সতী ৰাধিকা ছোৱালী উচ্চ মাধ্যমিক বিদ্যালয়, বটদ্ৰৱা ভেটিয়নী প্ৰাথমিক বিদ্যালয়ৰ লগতে বটদ্ৰৱা শ্ৰীশ্ৰী শঙ্কৰদেৱ উচ্চতৰ মাধ্যমিক বিদ্যালয়ত আজি বিভিন্ন সজাগতামূলক কাৰ্যসূচীৰে এই দিৱসটি পালন কৰা হয় ৷

ধঁপাত সেৱনৰ ফলত হ'ব পৰা বিভিন্ন মাৰাত্মক তথা দুৰাৰোগ্য ৰোগ সম্বন্ধে বিদ্যালয়ৰ শিক্ষক-শিক্ষয়িত্ৰীসকলে বিদ্যালয়ৰ ছাত্ৰ-ছাত্ৰীসকলক অৱগত কৰি সজাগতা সভাৰ আয়োজন কৰে ৷ 

উল্লেখ্য যে কেইবাখনো বিদ্যালয়ত আজি এই গুৰুত্বপূৰ্ণ কাৰ্যসূচী ছাত্ৰ-ছাত্ৰী প্ৰকৃতাৰ্থত লাভান্বিত হোৱাকৈ ইণ্টাৰনেটৰ সহায়ত মোবাইল আদিৰ দ্বাৰাও ধঁপাত সেৱনৰ অপকাৰিতা সম্পৰ্কে ভিডিঅ' আদি প্ৰদৰ্শনৰ কৰি অতি গুৰুত্বসহকাৰে পালন কৰা হয় ৷