বঙাইগাঁৱত পূজা সমিতিৰে জিলা প্ৰশাসনৰ সভা

সমাগত দুৰ্গাপূজা উপলক্ষে পূজা আয়োজক সমিতিসমূহৰ বিষয়ববীয়াসকলৰ লগত পূজা সুকলমে অনুষ্ঠিত কৰা সন্দৰ্ভত বঙাইগাঁও জিলা প্ৰশাসনৰ তৰফৰ পৰা এখন সভা অনুষ্ঠিত কৰা হয়৷ জিলা উপায়ুক্ত কাৰ্যালয়ৰ সভাকক্ষত অনুষ্ঠিত সভাত সভাপতিত্ব কৰে উপায়ুক্ত বাবুলাল শৰ্মাই

 সভাত দুৰ্গাপূজা উদ্‌যাপন কৰোঁতে কি কি নীতি-নিৰ্দেশনা মানি চলিব লাগিব সেই বিষয়ে উপায়ুক্ত শৰ্মাই বিতংভাৱে পূজা সমিতিসমূহক অৱগত কৰে ৷ তেওঁ কয় যে পূজা সমিতিসমূহে উপযুক্তভাৱে জিলা প্ৰশাসনৰ পৰা অনুমতি ল'ব লাগিব ৷

তেওঁলোকে অগ্নিনিৰ্বাপক সঁজুলি মজুত ৰাখিব লাগিব ৷ পুৱা ৭.৩০ বজাৰ পৰা নিশা ১১ বজালৈ পূজাৰ মেলা থাকিব ৷ সাংস্কৃতিক অনুষ্ঠান থাকিলে নিশা ১২ বজাৰ ভিতৰত সামৰিব লাগিব ৷ যদি ১২ বজাৰ পিছত সাংস্কৃতিক অনুষ্ঠান চলাই নিব খোজে তাৰবাবে সমিতিসমূহে আছুতীয়াকৈ অনুমতি ল'ব লাগিব ৷

পূজাস্থলীত পৰ্যাপ্ত পোহৰৰ ব্যৱস্থা কৰিব লাগিব ৷ কোনোধৰণৰ জুৱা পাতিবলৈ অনুমতি দিয়া নহ'ব ৷ উচ্চ শব্দ সৃষ্টিকাৰী ফটকা বা আতচবাজি ফুটাব নোৱাৰিব ৷ পূজাস্থলীত চিচি টিভি কেমেৰাৰ ব্যৱস্থা থাকিব লাগিব বুলিও কয় ৷

আনহাতে, আৰক্ষী অধীক্ষক হৃদয়জিৎ বৰ্মনে সভাত কয় যে পূজা সমিতিসমূহে পূজাস্থলীত ২৪ ঘণ্টাই স্বেচ্ছাসেৱক ৰাখিব লাগিব ৷ পুৰুষ-মহিলাৰ পৃথক প্ৰৱেশ তথা প্ৰস্থানৰ পথ থাকিব লাগিব ৷ তেওঁ পূজা সমিতিসমূহৰ বিষয়ববীয়াসকলক যদি পূজাস্থলীত পৰিত্যক্ত বেগ আদি পায় তেতিয়াহ'লে ততালিকে আৰক্ষীক জনাবলৈ আহ্বান জনায় ৷

এপিডিচিএলৰ বঙাইগাঁও বৈদ্যুতিক সংমণ্ডলৰ এছ ডি অ'ই পূজা সমিতিসমূহক পূজাৰ কিছুদিন আগতেই বিদ্যুৎ সংযোগৰ বাবে আবেদন জনাবলৈ অনুৰোধ জনায় ৷ তদুপৰি, আৰ্থিঙৰ ব্যৱস্থাও কৰিবলৈ কয় যাতে বিদ্যুতৰ পৰা কোনো ধৰণৰ অবাঞ্চিত ঘটনা নঘটে ৷

সভাত অগ্নিনিৰ্বাপক বাহিনীৰ বিষয়াই পূজাৰ গে'টসমূহ অন্তত: ১২ ফুট ওখকৈ সাজিবলৈ পূজা সমিতিসমূহক আহ্বান জনাই কয় যে যাতে প্ৰয়োজনত অগ্নিনিৰ্বাপক বাহিনীৰ বাহন সহজে গে'ট পাৰ হৈ যাব পাৰে ৷

তদুপৰি, তেওঁ পানী, বালি আদি অগ্নিনিৰ্বাপণৰ সামগ্ৰী পূজাস্থলীত মজুত ৰাখিবলৈ অনুৰোধ জনায় ৷ সভাত উপায়ুক্তগৰাকীয়ে কয় যে বিজয়া দশমীৰ দিনা সন্ধিয়া সাত বজাৰ ভিতৰত প্ৰতিমা বিসৰ্জন কাৰ্য সমাপ্ত কৰিব লাগিব ৷

বিসৰ্জনৰ দিনা যি পূজা সমিতিয়ে বিসৰ্জন যাত্ৰা শৃংখলাবদ্ধভাৱে কৰে তেওঁলোকক পুৰস্কাৰ প্ৰদান কৰা হ'ব ৷ সেইদৰে বঙাইগাঁও পৌৰসভাৰ সভাপতি দীপু চৌধুৰীয়ে পৰিষ্কাৰ-পৰিছন্নতা অটুট ৰখা তিনিখন পূজা সমিতিক প্ৰথম পুৰস্কাৰ হিচাপে ১০ হেজাৰ টকা, দ্বিতীয় পুৰস্কাৰ ৫ হেজাৰ টকা আৰু তৃতীয় পুৰস্কাৰ হিচাপে ৩ হেজাৰ টকা আগবঢ়াব বুলি কয় ৷ সভাত জিলাৰ অতিৰিক্ত উপায়ুক্তসকলো উপস্থিত থাকে ৷