মৃত পশু পুতি পৰিৱেশ নিকাকৰণৰ ব্যতিক্ৰমী প্ৰয়াস হিতেশ বৰুৱাৰ

জামুগুৰিহাটৰ পৰা প্ৰণৱজ্যোতি ভট্টাচাৰ্য 

চতিয়াৰ পশ্চিম নাগশংকৰ বেচৰকাৰী উচ্চতৰ মাধ্যমিক বিদ্যালয়ৰ বিষয় শিক্ষক হিতেশ বৰুৱা ৷ বিগত ৯ বছৰে বিনা বেতনে শিক্ষাদান কৰি অহা এইজন ভূগোল শিক্ষকক আৰ্থিক অভাৱে জুৰুলা কৰিছে ৷ তথাপিও কিন্তু তেওঁ মানসিকভাৱে এজন ধনাঢ্য ব্যক্তি ৷

যোৱা ৫ বছৰে তেওঁ এক ব্যতিক্ৰমী ধৰণেৰে পৰিৱেশৰ সেৱা কৰি আহিছে ৷ ৰাজপথত বাছ, ট্ৰাক বিশেষকৈ নৈশ বাছৰ খুন্দাত বহু ছাগলী, কুকুৰ, গৰু আদি পশুৰ মৃত্যু ঘটে ৷ ৰাজপথৰ দাঁতিত বাস কৰা বহু শিক্ষিত ব্যক্তিয়ে এনে পশুৰ মৃতদেহ দেখিও কোনো প্ৰতিক্ৰিয়া প্ৰকাশ নকৰে ৷

বৰং দুৰ্গন্ধৰ লগতহে সহাৱস্থান কৰে ৷ হিতেশে বৰুৱাই কিন্তু এনে মৃতদেহ দেখা পালে ওচৰৰ গৃহস্থৰ ঘৰৰ পৰাই কোৰ এখন খুজি আনি, পথৰ দাঁতিত গাঁত খান্দি মৃতদেহ পুতি থৈহে পুনৰ নিজৰ কাম কৰে ৷

বহু লোকে তেওঁক প্ৰশংসা কৰিছে যদিও ইতিকিং কৰা মানুহো নোহোৱা নহয় ৷ বহুতে আকৌ তেওঁৰ এই সমাজসেৱাক স্বচ্ছ ভাৰত অভিযানৰ অংশ বুলিও ভুল কৰে ৷ কিন্তু কোনোধৰণৰ নাম কিনাৰ পক্ষপাতী নোহোৱা হিতেশ বৰুৱাই ইতিমধ্যে এদল সহযোগী সৃষ্টি কৰিবলৈ সক্ষম হৈছে ৷