নাৰায়ণপুৰৰ পথালিপাহাৰত এচিড ঢালি কলেজীয়া ছাত্রীক আক্ৰমণ 

লখিমপুৰ জিলাৰ এখন অগ্ৰণী উচ্চ শিক্ষানুষ্ঠানৰ এগৰাকী ছাত্রীক পথৰ ওপৰতে এজন যুৱকে এচিড ঢালি আক্ৰমণ কৰাৰ ঘটনাই সমগ্ৰ জিলাখনতে তীব্ৰ চাঞ্চল্যৰ সূষ্টি কৰিছে ৷

জানিব পৰা মতে, জিলাখনৰ নাৰায়ণপুৰৰ বান্দৰদেৱা আৰক্ষী চকীৰ অৰ্ন্তগত পথালিপাহাৰস্থিত শংকৰদেৱ মহাবিদ্যালয়ৰ স্নাতক প্ৰথম ষাণ্মাষিকৰ ময়ূৰি ৰাজখোৱা নামৰ ছাত্রীগৰাকী মহাবিদ্যালয় ছুটীৰ পিছত গৃহাভিমুখে গৈ থকা অৱস্থাত বিপৰীত ফালৰ পৰা এখন মটৰচাইকেলত আহি থকা এজন যুৱকে মহাবিদ্যালয়ৰ সমীপতে ছাত্রীগৰাকীৰ দেহত এচিড ঢালি  পলায়ন কৰে ৷

জানিব পৰা মতে, প্ৰেমৰ প্ৰস্তাৱ অগ্ৰাহ্য কৰাৰ বাবেই ছাত্রীগৰাকীৰ গাত এচিড ঢালি পলায়ন কৰা পাপু বৰা নামৰ  যুৱকজনৰ ঘৰ পথালিপাহাৰৰ ৩নং পিঠাগুৰিয়া গাঁৱত ৷

ঘটনাৰ খবৰ বিয়পি পৰাৰ পিছতেই মহাবিদ্যালয়খনৰ ছাত্র-ছাত্রীসকলে ১৫নং ৰাষ্ট্ৰীয় ঘাইপথ অৱৰোধ কৰি ৰখাত প্ৰায় দুঘণ্টা সময় ধৰি পথটোৰে যাতায়াত বন্ধ হৈ পৰে ৷ বৰ্তমান ছাত্রীগৰাকী সংকটজনক অৱস্থাত লখিমপুৰ অসামৰিক চিকিৎসালয়ত চিকিৎসাধীন হৈ আছে ৷

দিন দুপৰতে সংঘটিত এনে ঘটনাক সৰ্বস্তৰৰ ৰাইজে গৰিহণা দিয়াৰ লগতে দোষীক উপযুক্ত শাস্তি প্ৰদানৰ দাবী জনাইছে ৷ উল্লেখ্য যে আৰক্ষীয়ে ইতিমধ্যে তদন্ত আৰম্ভ কৰিছে যদিও পলাতক কুলাংগাৰ যুৱকজনক বাতৰি লিখাৰ সময়লৈকে আৰক্ষীয়ে গ্ৰেপ্তাৰ কৰিবলৈ সক্ষম হোৱা নাই ৷