মৰিগাঁৱত ব্যৱসায়িক প্ৰতিষ্ঠানৰ বিৰুদ্ধে মাটি বেদখলৰ অভিযোগ

মৰিগাঁৱৰ পৰা জিতুমণি নাথ

মৰিগাঁও বাচনা ঘাটত নৱনিৰ্মিত আৰ ডি মটৰ্ছ নামৰ ব্যৱসায়িক প্ৰতিষ্ঠানটোৰ বিৰুদ্ধে ভূমি বেদখলৰ এক গুৰুতৰ অভিযোগ উঠা ঘটনাই চাঞ্চল্য সৃষ্টি কৰিছে । এই অভিযোগ তুলিছে পৰিয়ালৰ হৈ ছেহনাজ খানম নামৰ মহিলাগৰাকীয়ে ।

অভিযোগ অনুসৰি, আৰ ডি মটৰ্ছক বিক্ৰী কৰা মাটি পৰিমাণ মতেই পূৰ্বে সীমা চমজি লৈছিল ব্যৱসায়িক প্ৰতিষ্ঠানটোৱে । সেই সীমাতে নিৰ্মাণ কৰিছিল পকা খুঁটি  প্ৰতিষ্ঠানটোৱে । অভিযোগকাৰীয়ে ব্যৱসায়িক প্ৰতিষ্ঠানটোৱে ক্ৰয় কৰা সীমালৈ ঘৰ ভাঙি দখলমুক্ত কৰি দিছিল ।

 পিছে আজি পুনৰ পূৰ্বৰ সীমাৰ বিপৰীতে গোটেই ঘৰটোকে মৰিবিলৰ পাৰলৈ দখল কৰাৰ লক্ষ্যৰে কেৱল আৰক্ষী আৰু চি আৰ পি এফ জোৱানক লগত লৈ দেৱাল নিৰ্মাণ কৰাত হতভম্ব হৈ পৰে পৰিয়ালটো ।

মাটি বিক্ৰী কৰা ছেহনাজ খানমৰ মতে এয়া ব্যৱসায় প্ৰতিষ্ঠানটোৱে বলপূৰ্বকভাৱে নিৰ্মাণকাৰ্য আৰম্ভ কৰিছে নিজৰ ক্ষমতাৰে । ইয়াক কোনো কাৰণতে মানি লোৱা নহ'ব । এই বিচাৰ আদালতৰ মজিয়াতহে হ'ব বুলি হুংকাৰ প্ৰদান কৰে ।

 পৰিয়ালৰ অভিযোগ, চৰকাৰী বিলখনৰ পৰা তিনি নল মাটি তৰ্জু । প্ৰশ্ন উঠিছে,  ম্যাদীমাটি ক্ৰয় কৰাৰ নামত কৌশলেৰে মৰিগাঁও মৰিবিলৰ তৰ্জু মাটি বেদখলত নামিছেনেকি ব্যৱসায় প্ৰতিষ্ঠানটোৱে । আনহাতে,  ব্যৱসায় প্ৰতিষ্ঠানটোৰ পক্ষত থিয় দিছে অভিযোগকাৰীৰ জ্যেষ্ঠ ভাতৃ আৰু বৌৱেক ।

এই দুই জ্যেষ্ঠ ভাতৃ আৰু বৌৱেকৰ প্ৰতি অভিযোগ ব্যৱসায় প্ৰতিষ্ঠানটোক মাটি বিক্ৰী কৰোঁতে সকলোৰে মত সাপেক্ষত সমুদায় বিক্ৰী কৰা হৈছিল উত্তৰাধিকাৰী সূত্ৰে লাভ কৰা দুই জ্যেষ্ঠ ভাতৃৰ অংশৰ মাটি ।

এইখিনিতে প্ৰশ্ন হয়, কিয় চক্ৰ বিষয়া বা মণ্ডলে ব্যৱসায় প্ৰতিষ্ঠানটোক এই মাটি চমজি দিয়াৰ পৰা বিৰত থাকিল । সি যি কি নহওক, সম্প্ৰতি মৰিগাঁৱৰ সচেতন মহলৰ দাবী ইয়াৰ এটা উচিত তদন্ত হ'ব লাগে ।