হাতত কাঁহী, কান্ধত চিলিণ্ডাৰ, ডিঙিত আলু-পিয়াঁজৰ মালা পিন্ধি গুৱাহাটীত আছুৰ বিশাল পদযাত্ৰা

ৰাজ্যৰ তৃতীয় পৰ্যায়ৰ নির্বাচনৰ প্ৰাকক্ষণত গুৱাহাটীত আছুৰ বিশাল প্ৰতিবাদ। মূল্যবৃদ্ধি ৰোধ কৰাৰ দাবীৰে সদৌ গুৱাহাটী ছাত্ৰ সন্থাৰ নেতৃত্ব ওলাই আহিল মহানগৰীৰ ৰাজপথলৈ বিশাল পদযাত্ৰাৰে।

হাতে হাতে খালি কাঁহী-বাতি, কান্ধত চিলিণ্ডাৰ, ডিঙিত আলু- পিয়াঁজৰ মালা পিন্ধি মূল্যবৃদ্ধি ৰোধ কৰাৰ দাবীৰে প্ৰতিবাদ সাব্যস্ত কৰে আছু কর্মী সকলে।

উল্লেখ্য, আছুৰ এই পদযাত্ৰাত অংশগ্ৰহণ কৰে একাংশ বৃদ্ধায়ো ৷ ইয়াৰোপৰি, প্ৰায় তিনিশতাধিক আছু কর্মী আৰু ছাত্ৰ-ছাত্ৰীয়ে অংশগ্ৰহণ কৰে প্ৰতিবাদী কাৰ্যসূচীত।

মূল্যবৃদ্ধি ৰোধ কৰক, সৰ্বানন্দ সোণোৱাল হায় হায়, বিজেপি চৰকাৰ মূর্দাবাদ, কলা বেপাৰী হুচিয়াৰ আদি বিভিন্ন শ্ল’গানেৰে আগবাঢ়ে প্ৰতিবাদী সমদল।
লতাশিলৰ শ্বহীদ ন্যাসৰ পৰা  জৰ্জ ফিল্ড হৈ দীঘলীপুখুৰীৰ পাৰেদি লতাশিল আৰক্ষী থানাৰ সম্মুখেৰে শ্বহীদ ন্যাসলৈ উভতি আহে দলটো।

প্ৰতিবাদী কাৰ্যসূচীত অংশগ্ৰহণ কৰে আছুৰ সদৌ গুৱাহাটীৰ সভাপতি আনোৱাৰ হুছেইন, ৰজমিল আলি প্ৰমুখ্যে আছুৰ শীৰ্ষ নেতৃত্বসকলেও।