বেবেজীয়াৰ ২নং যুৰীয়া নামঘৰৰ "শৰাই এদিন" উদ্‌যাপন

নগাঁও জিলাৰ ঐতিহ্যমণ্ডিত দুশ বছৰীয়া বেবেজীয়া ২নং যুৰীয়া নামঘৰৰ ভাদমহীয়া "শৰাই এদিন" উৎসৱ বুধবাৰে উদ্‌যাপন কৰা  হয় । পুৱা  প্ৰাতঃ প্ৰসংগ, শৰাই সফুঁৰা, অৰ্চন-বন্দন আৰু নাম-প্ৰসংগৰে ভকত-বৈষ্ণৱসকলে যুৰীয়া নামঘৰত হৰিনামৰ সুললিত  সুৰে সমগ্ৰ অঞ্চলটোৰ আকাশ-বতাহ মুখৰিত কৰি তোলে ।

দুপৰীয়া নামাচাৰ্য হৰেন বৰাই নাম-কীৰ্তনেৰে শুভাৰম্ভ কৰাৰ পিছতে  বিয়লি প্ৰসাদ বিতৰণ কৰা হয় । উল্লেখ যে মাহ-প্ৰসাদ, পিঠাগুৰি আৰু গুড়ৰ মিশ্ৰণেৰে তৈয়াৰ কৰা মিঠৈ, লাড়ু, কোমল চাউল আৰু ম'হৰ গাখীৰৰ দৈৰ সৈতে ভক্তপ্ৰাণ ৰাইজক আপ্যায়ন কৰা হয় ।

বিশেষকৈ কলগছৰ দোনাত কোমল চাউল আৰু দৈ গাখীৰৰ  জলপান আপ্যায়নত ভক্তপ্ৰাণ ৰাইজ আপ্লুত হৈ পৰে । বিশিষ্ট সমাজকৰ্মী তথা নামঘৰ পৰিচালনা সমিতিৰ সভাপতি বিনোদ বৰুৱাই  আঁতধৰা অনুষ্ঠানত সাংবাদিক দেবজিৎ হাজৰিকা, শিক্ষক ক্ষীৰোদ বৰা আৰু যুৱনেতা বলীন্দ্ৰ কাকতিক সম্বৰ্ধনা জনোৱা হয় ।

সন্ধ্যা  বন্তি প্ৰজ্জ্বালনেৰে দিনজোৰা কাৰ্যসূচীৰ সামৰণি মৰা হয় ।