তামুলপুৰ শংকৰদেৱ বিদ্যা নিকেতনত শিক্ষক দিৱস পালন

শিশু শিক্ষা সমিতিৰ দ্বাৰা পৰিচালিত শংকৰদেৱ বিদ্যা নিকেতন, তামুলপুৰৰ ছাত্ৰ ভাৰতীৰ সৌজন্যত আজি শিক্ষক দিৱস পালন কৰা হয় ।

সেই উপলক্ষে ছাত্ৰ ভাৰতীৰ অধ্যক্ষ জ্যোতিস্মিতা দাসৰ অধ্যক্ষতাত অনুষ্ঠিত সভাখনৰ উদ্দেশ্য বাখ্য কৰে ছাত্ৰ ভাৰতীৰ মন্ত্ৰী  প্ৰেৰণা দাসে । বন্তি প্ৰজ্জ্বালনেৰে সভাখন শুভাৰম্ভ কৰে নিকেতন পৰিচালনাৰ উপ-সভাপতি নবীন চন্দ্ৰ কলিতাই ।

সুভাষিত, অমৃত বচন আৰু আমাৰ লক্ষ্য পাঠ কৰে ক্ৰমে সমৰজ্যোতি ৰাজবংশী, মনশ্ৰী কলিতা আৰু ধৃতিস্মান শৰণীয়াই । নিকেতনৰ প্ৰধান আচাৰ্য সুৰেন্দ্ৰ নাথ কলিতাই ডঃ সৰ্বপল্লী ৰাধা কৃষ্ণনৰ প্ৰতিচ্ছবিত মাল্যাৰ্পণৰ পিছতে ছাত্ৰ ভাৰতীৰ একাংশ শিল্পীয়ে পৰিবেশন কৰে সমবেত সংগীত ।

নিকেতনৰ ছাত্ৰী ৰাজশ্ৰী বৈশ্য আৰু ছাত্ৰ প্ৰীতম দাসে আঁতধৰা সভাখনত বিশিষ্ট সাংস্কৃতিক কৰ্মী লেহোৰাম বড়ো আৰু অৱসৰপ্ৰাপ্ত শিক্ষক যতীন্দ্ৰ নাথ দাসে ৰাধাকৃষ্ণনৰ জীৱনৰ ওপৰত আলোকপাত কৰে ।

সভাত প্ৰস্তুতি বৰ্মনে কবিতা আবৃত্তি, চুলি কলিতাই আধুনিক গীত আৰু দশম শ্ৰেণীৰ একাংশ ছাত্ৰীয়ে নৃত্য পৰিবেশন কৰি সকলোকে আপ্লুত কৰে । উক্ত সভাত ছাত্ৰ ভাৰতীৰ তৰফৰ পৰা আচাৰ্য আৰু কৰ্মচাৰীসকলক ফুলাম গামোচা, কলম আৰু ডায়েৰীৰে সম্বৰ্ধনা জ্ঞাপন কৰে ।

ইপিনে শিক্ষক দিৱস উপলক্ষে তামুলপুৰ উচ্চতৰ মাধ্যমিক বিদ্যালয়ত ছাত্ৰ ভাৰতী আৰু আচাৰ্য ভাৰতীৰ মাজত অনুষ্ঠিত প্ৰীতি ফুটবল খেলখনত আচাৰ্য ভাৰতীয়ে ছাত্ৰ ভাৰতীক ২-১ গ'লত পৰভূত কৰে ।