প্ৰধানমন্ত্ৰী কিষাণ সন্মান নিধি আঁচনিত দুৰ্নীতি:৮৭ নং বংশৰ গাঁও পঞ্চায়তত হিতাধিকাৰীৰ ভুৱা তালিকা

মৃণাল ডেকা,শুৱালকুছি: 

প্ৰধানমন্ত্ৰী কিষাণ সন্মান নিধি আচঁনি ৰূপায়ণত শুৱালকুছি উন্নয়ন খণ্ডৰ অন্তৰ্গত বিভিন্ন পঞ্চায়তৰ লগতে ৮৭ নং বংশৰ গাওঁ পঞ্চায়তত হিতাধিকাৰী বাচনিত ব্যাপক অনিয়ম হোৱাৰ অভিযোগ উত্থাপন হৈছে ৷ হিন্দু বসতি প্ৰধান পঞ্চায়তটোত ভুৱা মুছলমান ধৰ্মাৱলম্বী হিতাধিকাৰীৰ উপৰি একাংশ চৰকাৰী চাকৰিয়াল ৰাজনৈতিক নেতাৰ অঙহী - বঙহি, কমবয়সীয়া ছাত্র  লগতে ভুমিহীন লোকৰ নাম হিতাধিকাৰীৰ তালিকাত ঠাই পোৱা বুলি অভিযোগ উঠিছে । প্ৰাপ্ত অভিযোগ অনুসৰি, ৮৭ নং বংশৰ গাওঁ  পঞ্চায়তত   মূছলমান ধৰ্মাৱলম্বী কোনো পৰিয়াল নথকাৰ পিছতো  পি এম কিষান সন্মান নিধিৰ তালিকাত মূছলমান হিতাধীকাৰীৰ নাম সন্নিবিষ্ট হোৱাত অঞ্চলটোত  তীব্র প্ৰতিক্ৰিয়াৰ সৃষ্টি হৈছে  ।  পঞ্চায়ত খনত  কোনো মূছলমান লোকৰ নাম ভোটাৰ তালিকাত নথকাৰ লগতে কোনো বসতি মাটি - বাৰী নাই বুলিও  স্থানীয় ৰাইজে  জানিবলৈ দিয়ে । তেনে ক্ষেত্ৰত কেনেদৰে বংশৰ পঞ্চায়তত মূছলমান লোকে পি এম কিষান সন্মান নিধিৰ তালিকাত কেনেকৈ ঠাই পালে সেয়া লক্ষণীয় বিষয় হৈ পৰিছে । পঞ্চায়তটোৰ অন্তৰ্ভুক্ত  হিতাধিকাৰী সকলৰ বেছিভাগে কৃষি কৰ্মৰ লগত জড়িত নহয় । তদুপৰি একেজন হিতাধিকাৰীৰ নাম একাধিকবাৰ বাছনি কৰাৰো অভিযোগ উঠিছে । হিতাধিকাৰীৰ মাজত চাকৰিয়াল, পেঞ্চনাৰ, ব্যৱসায়ী,  ছাত্রৰ লগতে পঞ্চায়ত সদস্য - সদস্যাৰ পুত্ৰ- কন্যা, অঙহী- বঙহীও হিতাধিকাৰীৰ তালিকাত ঠাই পাইছে বুলিও অভিযোগত প্ৰকাশ কৰে । পঞ্চায়তখনৰ  মূছলমান লোকৰ হিতাধিকাৰীৰ তালিকাত থকা ক্ৰমিক নং ১ আব্দুল  মতলিব ,৬ আক্ৰাম হুছেইন ১৪ আনোৱাৰ আলী , ২০ বাহাৰুল ইছলাম ,আদিকে  ধৰি কেবাজনৰো নাম আছে ।      । এনেদৰে পঞ্চায়ত খনত মুছলমান ধৰ্মাৱলম্বী লোকৰ নাম  পি এম কিষান সন্মান নিধি আচনিত হিতাধিকাৰী ৰূপে ঠাই পাইছে । হিন্দু অধ্যুৰ্ষিত পঞ্চায়তটোত মুছলমান হিতাধীকাৰীৰ নাম কিয় সন্নিবিষ্ট হ'ল আৰু পঞ্চায়তটোত সংঘটিত অনিয়মৰ উচিত তদন্তৰ দাবী জনাই প্ৰকৃত কৃষকক আচনিত সন্নিৱিষ্ট কৰিবলৈ অঞ্চলটোৰ সচেতন মহলে চৰকাৰৰ ওচৰত দাবী তুলিছে।
 --------------------------------------