'লকডাউন'ত দিন হাজিৰা কৰা লোকৰ মাজত খাদ্য সামগ্ৰী বিলালে গোলাঘাট আৰক্ষীয়ে

গোলাঘাটৰ পৰা মীনাক্ষি ফুকন:

'লকডাউন'ৰ সময়ত দৈনিক কাম কৰি জীৱন নিৰ্বাহ কৰা লোকসকলৰ বাবে শুকুৰবাৰে গোলাঘাট আৰক্ষীয়ে আগবঢ়ালে সহায়ৰ হাত।নিজা বেতনৰ দহ শতাংশ দান কৰি চহৰখনৰ দিন হাজিৰা কৰা লোকসকলক বিলালে পাঁচ কেজিকৈ চাউল,দাইল,আলু,চাবোন আদিকে কৰি অত্যাৱশ্যকীয় সামগ্ৰী।লকডাউনৰ যোৱা তিনিদিন লঘোণে থকা এই সকলৰ বাবে যেন এয়া আছিল ঈশ্বৰৰ দান।আৰক্ষীৰ লোকসকলে প্ৰত্যকৰ ঘৰে ঘৰে এই সামগ্ৰী দিয়াৰ লগতে সৰ্তকতাৰে ঘৰৰ পৰা ওলাই নাহিবলৈও আহ্বান জনালে লোকসকলক। লকডাউনৰ সময়ত কাম নাপাই এসাঁঁজ খাবলৈ চিন্তাত পৰা লোকসকলে আৰক্ষীৰ এনে পদক্ষেপক আন্তৰিক ধন্যবাদ জ্ঞাপন কৰে। উল্লখ্য যে গোলাঘাট জিলা আৰক্ষী অধীক্ষক পুষ্পৰাজ সিঙে জানিবলৈ দিয়ে যে কিছুদিনৰ ভিতৰত গোলাঘাট চহৰৰ পদপথৰ লোকসকলৰ মাজতো আৰক্ষীয়ে এনেদৰে খাদ্য সামগ্ৰী বিতৰণ কৰিব।