বঙাইগাঁৱৰ চাপৰাকাটাত পথ দুৰ্ঘটনা:এজন নিহত

বঙাইগাঁৱৰ প্ৰতিবেদক:

বঙাইগাঁও সদৰ থানাৰ অন্তৰ্গত চাপৰাকাটাত শুকুৰবাৰে নিশা প্ৰায় ৮ বজাত সংঘটিত এটা পথ দুৰ্ঘটনাত এজন স্কুটী আৰোহী নিহত হোৱাৰ বিপৰীতে আন এজন যুৱক গুৰুতৰভাৱে আহত হয় ৷নিহত যুৱকজন চিৰাং জিলাৰ বিজনীৰ ২ নং চাৰাপেটৰ হেনৰী বসুমতাৰী(২৩) বুলি চিনাক্ত কৰা হৈছে ৷ আনহাতে আহতজন বিজনীৰ শিলবাৰী মৰাপাৰাৰ পবিত্ৰ ব্ৰহ্ম(২০) বুলি জানিব পৰা গৈছে ৷ বঙাইগাঁও যান- বাহন শাখাৰ আৰক্ষীয়ে জানিবলৈ দিয়া মতে পৱিত্ৰ ব্ৰহ্ম আৰু হেনৰী বসুমতাৰীয়ে কোকৰাঝাৰৰ পৰা চিৰাং জিলাৰ বিজনীৰ নিজ ঘৰলৈ বুলি এ এছ ১৯ এম ৮৭৬৭ নম্বৰৰ স্কুটী এখনেৰে গৈ থকা অৱস্থাত বঙাইগাঁৱৰ চাপৰাকাটাৰ ৰাষ্ট্ৰীয় ঘাই পথত একে দিশে গৈ থকা এখন অচিনাক্ত ট্ৰাকে পিচফালৰ পৰা স্কুটীখনক খুন্দিয়াই থৈ পলায়ন কৰাত যুৱক দুজন গুৰুতৰভাৱে আহত হয় ৷ পিচত দুৰ্ঘটনাৰ খবৰ পাই ঘটনাস্থলীত যান বাহন শাখাৰ আৰক্ষী উপস্থিত হৈ আহত যুৱক দুজনক উদ্ধাৰ কৰি বঙাইগাঁও অসামৰিক চিকিৎসালয়ত ভৰ্তি কৰে যদিও হেনৰী বসুমতাৰীৰ মৃত্যু হয় ৷ আনহাতে আহত পৱিত্ৰ ব্ৰহ্ম বৰ্তমানে চিকিৎসাধীন হৈ আছে ৷