বঙাইগাঁও জিলাৰ কোকিলাত আৰক্ষীয়ে উচ্ছেদ কৰিলে জুৱা 

বঙাইগাঁৱৰ প্ৰতিবেদক:

বঙাইগাঁও জিলাৰ কোকিলাত মঙলবাৰে নিশা আৰক্ষীয়ে জুৱা খেল উচ্ছেদ কৰাৰ লগতে জুৱা খেলত ব্যৱহৃত বিভিন্ন সামগ্ৰী জব্দ কৰে ৷ জানিব পৰা মতে কোকিলা আৰক্ষী নিৰীক্ষণ চকীৰ অন্তৰ্গত শোলমাৰী পোকালাগী নদীৰ চৰত সন্ধিয়া দুষ্ট চক্ৰই দীপাৱলীৰ নামলৈ ঝাণ্ডি মুণ্ডা জুৱা খেল অনুষ্ঠিত কৰে। পিচত কোকিলা আৰক্ষীয়ে এই খবৰ লাভ কৰে আৰু সহকাৰী উপ পৰিদৰ্শক শিৱ প্ৰসাদ কলিতাৰ নেতৃত্বত যোৱা আৰক্ষীৰ দলে জুৱাখেল উচ্ছেদ কৰাৰ লগতে জুৱা খেলত ব্যৱহৃত ডাইচগুটি, লাইট, বেটাৰীসহ বিভিন্ন সা-সামগ্ৰী জব্দ কৰে । অৱশ্যে আৰক্ষীৰ দল উপস্থিত হোৱাৰ লগে লগে আন্ধাৰৰ সুযোগ লৈ জুৱাৰীৰ দলটো পলায়ন কৰে। জুৱাখেলৰ বিৰুদ্ধে কোকিলা আৰক্ষীয়ে কঠোৰ স্থিতি গ্ৰহণ কৰাত স্থানীয় ৰাইজে সন্তুষ্টি প্ৰকাশ কৰিছে।