জালুকবাৰীৰ দদৰাত গান্ধী সংকল্প যাত্ৰাত অংশগ্ৰহণ সাংসদ কুইন ওজা ,মন্ত্ৰী হিমন্ত বিশ্ব শৰ্মাৰ 

শুৱালকুছিৰ পৰা মৃণাল ডেকাৰ প্রতিবেদন :

মহা মানৱ মহাত্মা গান্ধীৰ ডেৰশ বছৰীয়া জন্মজয়ন্তী উপলক্ষে বিজেপি দলে সমগ্ৰ দেশজুৰি পালন কৰা সংকল্প যাত্ৰাৰ অংশ হিচাপে আজি গুৱাহাটী লোকসভা  সমষ্টিৰ অন্তৰ্গত জালুকবাৰী বিধানসভা সমষ্টিৰ দদৰাত গান্ধী সংকল্প পদ যাত্ৰা উলিওৱা হয় ৷ জালুকবাৰী বিজেপিৰ উদ্যোগত দদৰা ভৃগু কুমাৰ ফুকন ৰাজহুৱা প্ৰেক্ষাগৃহৰ  পৰা উলিওৱা গান্ধী সংকল্প পদ যাত্ৰাত সাংসদ কুইন ওজা ,মন্ত্ৰী হিমন্ত বিশ্ব শৰ্মা অসম ৰাজ্যিক বিজেপিৰ সাংগঠনিক সম্পাদক ফণিন্দ্ৰনাথ শৰ্মা ,গুৱাহাটী মহানগৰ জিলা  যুৱ মৰ্চাৰৰ সভাপতি মানস প্ৰতিম দাস জিলা যুৱ মৰ্চাৰ মিডিয়া আহ্বায়ক হিমাংশু বৈশ্য , আদিয়ে অংশ গ্ৰহণ কৰে ৷ দদৰা ভৃগু কুমাৰ ফুকন ৰাজহুৱা প্ৰেক্ষাগৃহৰ পৰা উলিওৱা গান্ধী সংকল্প পদ যাত্ৰা  মূল পথেৰে আহি দলিবাৰী , আমিনগাঁৱ হৈ প্ৰায় ১০ কি.লি.পথ অতিক্ৰম কৰি উত্তৰ গুৱাহাটীৰ ফেকাল্টি হায়াৰ ছেকেণ্ডাৰীৰ সম্মুখত উপস্থিত হৈ কাৰ্যসূচীৰ সামৰণি পৰে ৷ যাত্ৰা পথত পদ যাত্ৰাকাৰীসকলে ভিন্ন জনক মহাত্মা গান্ধীৰ চমু জীৱন আৰু আদৰ্শ সম্বলিত প্ৰচাৰ পত্ৰও বিতৰণ কৰে ৷ উল্লেখ্য যে পদ যাত্ৰা কাৰ্যসূচীৰ পূৰ্বে এখন সভাও অনুষ্ঠিত হয় ৷ সভাৰ আৰম্ভণিতে  মহামানৱ মহাত্মা গান্ধীৰ প্ৰতিচ্ছবিত বন্তি প্ৰজ্বলন কৰি শ্ৰদ্ধাঞ্জলি জ্ঞাপন কৰে সাংসদ কুইন ওজা আৰু মন্ত্ৰী ডঃ হিমন্ত বিশ্ব শৰ্মাই ৷ সংকল্প পদ  যাত্ৰাত  অংশগ্ৰহণ কৰি মন্ত্ৰী হিমন্ত বিশ্ব শৰ্মাই কয় যে মহাত্মা গান্ধীৰ আদৰ্শৰ লগতে প্ৰধানমন্ত্ৰী নৰেন্দ্ৰ মোডীয়ে দেশৰ কল্যাণৰ বাবে গ্ৰহণ কৰা বিভিন্ন সংকল্প যেনে স্বচ্ছ ভাৰত অভিযান, এবাৰ ব্যৱহৃত প্লাষ্টিক বৰ্জন আদি সাৰ্থক কৰিবলৈ সকলোকে মাজত সজাগতা সৃষ্টিৰ আহ্বান জনায়। লগতে তেও কয় যে এই সংকল্প যাত্ৰাৰ জৰিয়তে মহা মানৱ মহাত্মা গান্ধীৰ ডেৰশ বছৰীয়া জন্মজয়ন্তী উপলক্ষে কমেও ১০ কিলোমিটাৰ পদ যাত্ৰা কৰি ৰাইজৰ লগত সম্পৰ্ক স্থাপন কৰা আৰু নিজৰ মনত মহা মানৱ মহাত্মা গান্ধীৰ আদৰ্শক হৃদয়ংগম কৰোৱাই এই সংকল্প যাত্ৰাৰ মূল উদ্দেশ্য।