বঙাইগাঁৱত ড্ৰাগছসহ পতি-পত্নী আটক

বঙাইগাঁৱৰ প্ৰতিবেদক:

বঙাইগাঁও ৰে'লৱে ষ্টেচনৰ ওচৰৰ ওল্ড কলনীৰ পৰা মঙলবাৰে সন্ধিয়া উত্তৰ বঙাইগাঁও আৰক্ষীয়ে ড্ৰাগছসহ এহাল পতি- পত্নীক আটক কৰে ৷ আটকাধীন দুই ড্ৰাগছ ব্যৱসায়ীৰ পৰা আৰক্ষীয়ে সাতটা ড্ৰাগছ ভৰ্তি কন্টেইনাৰ জব্দ কৰে ৷ উত্তৰ বঙাইগাঁও আৰক্ষী পহৰা চকীৰ ভাৰপ্ৰাপ্ত আৰক্ষী বিষয়া মুনিন্দ্ৰ নাৰায়ণ দাসে সংবাদ মাধ্যমক জানিবলৈ দিয়া মতে,গোপন সূত্ৰৰ পম খেদি সন্ধিয়া প্ৰায় ৬ঃ৩০ বজাত ড্ৰাগছৰ বেহাৰ লগত জড়িত বিজয় সৰকাৰ আৰু পূজা সৰকাৰক আটক কৰে ৷ সম্পৰ্কত দুয়ো পতি- পত্নী বুলিও জানিবলৈ দি কয় যে কিছুদিন পূৰ্বে বঙাইগাঁৱৰ গুৰুনানক নগৰৰ এটা ঘৰত ড্ৰাগছৰ বিৰুদ্ধে চলোৱা অভিযানৰ সময়ত এই দুই ব্যৱসায়ীয়ে পলায়ন কৰাত আৰক্ষীয়ে আটক কৰাৰ বাবে চেষ্টা অব্যাহত ৰাখিছিল ৷ ইতিমধ্যে এই আটকাধীন বিজয় সৰকাৰ আৰু পূজা সৰকাৰৰ বিৰুদ্ধে বঙাইগাঁও থানাত ৬৯৬/ ১৯ নম্বৰৰ গোচৰ ৰুজু হৈ থকা বুলিও জানিবলৈ দিয়ে ৷

আটকাধীন বিজয় সৰকাৰৰ ঘৰ চিৰাং জিলাৰ বিজনী চহৰৰ চাৰি নং ৱাৰ্ডৰ দুৰ্গা কলনীত ৷ উল্লেখ্য যে বিজনীৰ বিভিন্ন প্ৰান্তত ড্ৰাগছৰ বেহা অব্যাহত থকাৰ লগতে তাৰ পৰাই বঙাইগাঁও চহৰ আদিলৈ একাংশ ব্যৱসায়ীয়ে যোগান ধৰি আহিছে ৷  আৰক্ষীয়ে ধৃত পতি-পত্নীক অধিক তথ্য উদঘাটনৰ বাবে জেৰা অব্যাহত ৰাখিছে।