নগাঁৱত অস্ত্ৰধাৰী দুৰ্বৃত্তৰ তাণ্ডৱ : পেট্ৰল পাম্পৰ মেনেজাৰক গুলীয়াই কাঢ়ি নিলে ডেৰ লাখ টকা

 নগাঁৱৰ পৰা ৱাহিদুদ জামানৰ প্রতিবেদন :

বৃহস্পতিবাৰে বিয়লি প্ৰায় ৪.৩০ বজাত নগাঁও জিলাৰ ননৈৰ সমীপৰ ৰাঙলু চিঙৰাপট্টিত সশস্ত্ৰ দুৰ্বৃত্তৰ এটা দলে এইচ পি পেট্ৰল পাম্পৰ মেনেজাৰ জনক গুলীয়াই ডেৰ লাখ টকা লুট কৰি লৈ যায়। এই ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে। নগাঁৱৰ আৰক্ষী সূত্ৰই জনোৱা মতে, জিলাখনৰ ৰাঙলুৰ চিঙৰাপট্টিৰ ৩৬ নম্বৰ ৰাষ্ট্ৰীয় ঘাইপথৰ দাঁতিত অৱস্থিত এইচ পি পেট্ৰল পাম্পটোৰ মেনেজাৰ ৰাজু জৈনে পেট্ৰল পাম্পটোত দিনৰ ভাগত সংগৃহীত প্ৰায় ডেৰ লক্ষাধিক টকা বেগত ভৰাই নগাঁও চহৰৰ বেংকত জমা থবলৈ যাবৰ বাবে পথৰ দাঁতিত গাড়ীৰ বাবে ৰৈ আছিল। তেনে সময়তে কঠিয়াতলীৰ ফালৰ পৰা তিনিখন মটৰ চাইকেলত উঠি অহা ছয় জনীয়া সশস্ত্ৰ দুৰ্বৃত্তৰ এটা দলে মেনেজাৰ জনলৈ বুলি লক্ষ্য কৰি পাঁচ জাঁই গুলী নিক্ষেপ কৰি তেওঁক আহত কৰে। মূৰত আৰু ভৰিত গুলী লগা মেনেজাৰ জন গুলীৰ আঘাতত মাটিত ঢলি পৰি ছটফটাই থকা সময়তে দুৰ্বৃত্তৰ দলটোৱে তেওঁৰ হাতৰ পৰা টকাৰ বেগটো কাঢ়ি লৈ সেই স্থানৰ পৰা আঁতৰি যায়। পিছত গুলীবিদ্ধ মেনেজাৰ জনক নগাঁও ভোগেশ্বৰী ফুকননী অসামৰিক চিকিৎসালয়ত ভৰ্তি কৰোৱা হয় যদিও তেওঁৰ আঘাত অতি গুৰুতৰ হোৱাত উন্নত চিকিৎসাৰ বাবে গুৱাহাটীলৈ প্ৰেৰণ কৰা হয়। আৰক্ষীয়ে দুৰ্বৃত্তৰ দলটোৰ সন্ধানত ব্যাপক অভিযান আৰম্ভ কৰিছে যদিও এই পৰ্যন্ত কোনো এজন দুৰ্বৃত্তকে কৰায়ত্ত কৰিবলৈ সক্ষম হোৱা নাই।
উল্লেখ্য যে, বিগত কিছু দিনৰ পৰা নগাঁও চহৰকে প্ৰমুখ্যে কৰি জিলা খনৰ বিভিন্ন অঞ্চলত চোৰ, ডকাইত, ধন লুট, চিলনী চোৰৰ তাণ্ডৱৰ ঘটনা অতি উদ্বেগ জনকভাৱে বৃদ্ধি পাইছে। যাৰ ফলত চৰম নিৰাপত্তা হীনতাত ভুগিছে জিলাবাসী।