মাজুলী জিলা ৰাষ্ট্ৰীয় শিশু বিজ্ঞান সমাৰোহৰ সামৰণি

মাজুলীৰ পৰা ৰাজীৱ পাতিৰৰ প্রতিবেদন : 

এক অভূতপূৰ্ব পৰিৱেশত ২৭ সংখ্যক ৰাষ্ট্ৰীয় শিশু বিজ্ঞান সমাৰোহৰ মাজুলী জিলা সমাৰোহখন দেওবাৰে মধ্য মাজুলীৰ ফুলনি উচ্চ মাধ্যমিক বিদ্যালয়ত বৰ্ণাঢ্য কাৰ্যসূচীৰে সম্পন্ন হয় । কাৰ্যসূচী অনুসৰি পৰিৱেশ নিকাকৰণ, গছ পুলি ৰোপণ কৰে ফুলনি উচ্চ মাধ্যমিক বিদ্যালয়ৰ সহকাৰী শিক্ষক গোবিন বৰাই । পুৱা আঠ বজাৰ পৰা আৰম্ভ হোৱা পন্জ্ঞীয়ন কাৰ্যসূচীত অতি উৎসাহ জনকভাৱে মাজুলীৰ বিভিন্ন বিদ্যালয়ৰ পৰা অহা তিনি শতাধিক শিশু বিজ্ঞানীয়ে নাম পন্জ্ঞীয়ন কৰে। ন বজাত আৰম্ভ হোৱা পতাকা উত্তোলন কাৰ্যসূচীত ৰাজ্যিক প্ৰতিনিধি কৃষ্ণ মেনন তামূলী, ৰাষ্ট্ৰীয় শিশু বিজ্ঞান সমাৰোহৰ সভাপতি তথা মাজুলী জিলাৰ অতিৰিক্ত উপায়ুক্ত চিন্ময় নাথ আৰু আয়োজক বিদ্যালয় ফুলনি উচ্চ মাধ্যমিক বিদ্যালয়ৰ প্ৰধান শিক্ষক দ্বিজেন শইকীয়াই পতাকা উত্তোলন কৰে । শিশু বিজ্ঞান সমাৰোহত মাজুলী জিলাৰ ১৪২ টা প্ৰকল্প শিশু বিজ্ঞানী সকলে প্ৰদৰ্শন কৰে। ইয়াৰ মাজৰ পৰাঅজয় দাস খাৰজান ট্ৰাইবেল হাইস্কুল, গকুল চন্দ্ৰ মিলি পুব মাজুলী খেৰকটীয়া হাইস্কুল, অনুপম শইকীয়া ৰতনপুৰ হাইস্কুল, পংকজ নৰহ বয়েজ ৰেছিডেন্সিয়েল স্কুল,ৰাওনাপাৰ, দীপ্ৰয়না বৰা গড়মূৰ শংকৰদেৱ বিদ্যা নিকেতন, দিপিকা শইকীয়া পিতাম্বৰদেৱ বালিকা হাইস্কুল,প্ৰিয়ংকা খাউণ্ড ভকতিদুৱাৰ হাইস্কুল, সোণালীকা হাজৰিকা দেউদিআটী চিনিয়ৰ বেচিক হাইস্কুল, পংকজ পায়েং ভোগপুৰ সত্ৰ বিকেডি হাইস্কুল,নৰেন্দ্ৰ শইকীয়া কশাল গাঁও বাপুজী হাইস্কুল,ভাগ্যলক্ষ্মী নাথ কমলাবাৰী শংকৰদেৱ শিশু নিকেতন আৰু জ্যোৎস্না বৰা  মেখেলি জনতা বালিকা হাইস্কুল আদি বাৰটা প্ৰকল্প ৰাজ্যিক পৰ্যায়লৈ নিৰ্বাচিত কৰা হয়। বিভিন্ন বিদ্যালয়ৰ পৰা অহা শিক্ষাৰ্থী,অভিভাৱক, শিক্ষকসকলক উদ্দেশ্যি দৃশ্য শ্ৰাব্য মাধ্যমেৰে আকৰ্ষনীয়ভাৱে জনপ্ৰিয় বিজ্ঞান বক্তব্য প্ৰদান কৰে যোৰহাট বিজ্ঞান কেন্দ্ৰ আৰু তাৰকাগৃহৰ তত্বাৱধায়ক ড' প্ৰণৱজ্যোতি চেতিয়াই ।

দিনৰ বাৰ বজাৰ পৰা মধ্য মাজুলী মিলন সংঘত অনুষ্ঠিত মুকলি সভা উদ্বোধন কৰে ৰঙাচাহী মহাবিদ্যালয়ৰ অধ্যক্ষ ড' নৱ কুমাৰ গামে । ৰাষ্ট্ৰীয় শিশু বিজ্ঞান সমাৰোহৰ সভাপতি তথা মাজুলী জিলাৰ অতিৰিক্ত উপায়ুক্ত চিন্ময় নাথে সভাপতিত্ব কৰা অনুষ্ঠানত মুখ্য অতিথি হিচাপে মাজুলী জিলাৰ উপায়ুক্ত দেৱ প্ৰসাদ মিশ্ৰ,সন্মানীয় অতিথি হিচাপে ক্ৰমে মাজুলী সাংস্কৃতিক বিশ্ববিদ্যালয়ৰ উপাচাৰ্য ড' ডম্বৰুধৰ নাথ আৰু মাজুলী মহাবিদ্যালয়ৰ অধ্যক্ষ ড' দেৱজিৎ শইকীয়া,বিশিষ্ট অতিথি হিচাপে অসম চিকিৎসা মহাবিদ্যালয়ৰ চকু বিভাগৰ পন্জ্ঞীয়ক ডাঃ ৰাজীৱ দাস,অসম বিজ্ঞান সমিতি মাজুলী শাখাৰ সভাপতি তিলক শৰ্মাই অংশগ্ৰহণ কৰে। অনুষ্ঠানত ৰাষ্ট্ৰীয় শিশু বিজ্ঞান সমাৰোহৰ মুখপত্ৰ বিজ্ঞেয়খন উন্মোচন কৰে যোৰহাট জিলা সমন্বয়ক ধীৰেন্দ্ৰ কুমাৰ গগৈয়ে । এই অনুষ্ঠান সফল কৰি তোলাত সহায়-সহযোগিতা আগবঢ়োৱা লোকলৈ মাজুলী জিলা সমন্বয়ক ড' নাৰায়ণ শৰ্মা আৰু শৈক্ষিক সমন্বয়ক জীৱন বৰাই কৃতজ্ঞতা জনোৱাৰ লগতে অনুষ্ঠান আঁত ধৰে ৰাষ্ট্ৰীয় শিশু বিজ্ঞান সমাৰোহ মাজুলী জিলা সমিতিৰ সহকাৰী জিলা সমন্বয়ক জয়ন্তমাধৱ কলিতাই ।