নাগ্ৰীজুলিত অটল বিহাৰী বাজপেয়ীক শ্ৰদ্ধাঞ্জলি

ভাৰত ৰত্ন, ভাৰতৰ প্ৰাক্তন প্ৰধানমন্ত্ৰী অটল বিহাৰী বাজপেয়ীৰ মহাপ্ৰয়াণত নাগ্ৰীজুলি মণ্ডল বিজেপিৰ কাউলিস্থিত কাৰ্যালয়ত আজি বিয়লি ৪ বজাত এক শ্ৰদ্ধাঞ্জলি অনুষ্ঠানৰ আয়োজন কৰা হয়। এই অনুষ্ঠানত নাগ্ৰীজুলি মণ্ডল বিজেপিৰ সভাপতি ৰাম বাস্তলা, নাগ্ৰীজুলি মণ্ডল বিজেপিৰ যুৱ মৰ্চাৰ সভাপতি শংকৰ দাস, ২৭ নং নাগ্ৰীজুলি বিটিচি পৰিষদীয় সমষ্টিৰ এমচিএলএ ধৰ্ম নাৰায়ণ দাস সহ নাগ্ৰীজুলি মণ্ডল বিজেপিৰ নেতা-কৰ্মী, সদস্য সকল উপস্থিত থাকে। 

অনুষ্ঠানত প্ৰয়াত প্ৰধান মন্ত্ৰী গৰাকীৰ প্ৰতিচ্ছবিত মাল্যৰ্পন কৰি আৰু বন্তি প্ৰজ্বলন কৰাৰ লগতে সকলোৱে এক মিনিট মৌন প্ৰাৰ্থনা কৰি প্ৰয়াত প্ৰধান মন্ত্ৰী গৰাকীৰ আত্মাৰ সদগতি কামনা কৰে। আজিৰ শ্ৰদ্ধাঞ্জলি অনুষ্ঠানত নাগ্ৰীজুলি মণ্ডল বিজেপিৰ সভাপতি ৰাম বাস্তলাই প্ৰয়াত বাজপেয়ীৰ কৰ্ম জীৱন আৰু আদৰ্শৰ বিষয়ে বাখ্যা কৰাৰ উপৰি অনুষ্ঠানত উপস্থিত সকলো দলীয় কৰ্মীকে আজি সন্ধিয়া সকলোৰে পদুলিত এগছি বন্তি প্ৰজ্বলন কৰি প্ৰয়াত অটল বিহাৰী বাজপেয়ীৰ প্ৰতি শ্ৰদ্ধা নিবেদন কৰাৰ বাবে আহ্বান জনায়।

ইপিনে গ্ৰাম্য বিকাশ মন নামৰ বেচৰকাৰী সংস্থাটোৱেও আজি নাগ্ৰীজুলি বজাৰত প্ৰয়াত প্ৰাক্তন প্ৰধান মন্ত্ৰী গৰাকীৰ মৃত্যুৰ প্ৰতি সন্মান জনাই এক শ্ৰদ্ধাঞ্জলি অনুষ্ঠানৰ আয়োজন কৰে। আজিৰ এই অনুষ্ঠানত গ্ৰাম্য বিকাশ মঞ্চৰ উপদেষ্টা আলাউদ্দীন আহমেদে উপস্থিত থাকি মহানায়ক গৰাকীৰ প্ৰতিচ্ছবিত মাল্যৰ্পন কৰে আৰু বন্তি প্ৰজ্বলন কৰে। গ্ৰাম্য বিকাশ মঞ্চৰ সভাপতি জোন দাস, সম্পাদক বিষ্ণু টুডু, নাগ্ৰীজুলি ভিচিডিচিৰ অধ্যক্ষ প্ৰদীপ সৰকাৰ, সমাজকৰ্মী অজিত স্বৰ্গীয়াৰী, স্থানীয় যুৱ সমাজকৰ্মী ক্ষিতীশ দাসৰ উপৰিও অঞ্চলটোৰ বহু সংখ্যক লোক এই শ্ৰদ্ধাঞ্জলি অনুষ্ঠানত স্বতঃস্ফূৰ্ত ভাবে উপস্থিত হয়৷