বঙাইগাঁৱত আৰক্ষীয়ে খেদি খেদি আটক কৰিলে ইৰাণী গ্ৰুপৰ দুই সদস্যক

বঙাইগাঁওঃ

বঙাইগাঁও চহৰত সঘনাই সংঘটিত হৈ অহা ধন লুটৰ ঘটনাৰ মাজতে  আজি আৰক্ষীয়ে এনে ঘটনাৰ লগত জড়িত ইৰাণী গ্ৰুপৰ দুজন সদস্যক আটক কৰে ৷ আৰক্ষীয়ে বঙাইগাঁও চহৰৰ মাজমজিয়াৰ পৰা খেদি খেদি আটক কৰা ইৰাণী গ্ৰুপৰ সদস্য দুজন পশ্চিম বংগৰ জলপাইগুৰী জিলাৰ ফাটা পুকুৰ গাঁৱৰ মনজিৎ গোৱালা (৩০) আৰু বীজেন্দ্ৰ গোৱালা ( ৩০) ৷ আৰক্ষীয়ে আটকাধীন সদস্য দুজনৰ পৰা এএছ-০১বি ৱাই-২৪৮৫ নম্বৰৰ পালচাৰ মটৰ চাইকেল এখনো জব্দ কৰে ৷ ঘটনা সন্দৰ্ভত জানিব পৰা মতে দিনৰ প্ৰায় ১.৩০ বজাত বঙাইগাঁও চহৰৰ মায়াপুৰী তিনি আলিৰ পৰা সুভাষ ৰোডৰ আশে - পাশে এখন মটৰ চাইকেল লৈ দুজন যুৱকে ঘূৰা-ফিৰা কৰি থকা প্ৰত্যক্ষ কৰি বঙাইগাঁও সদৰ থানাৰ ভাৰপ্ৰাপ্ত আৰক্ষী বিষয়া গৰাকীৰ যুৱক দুজনৰ ওপৰত সন্দেহ ওপজে ৷

পিছত আৰক্ষী বিষয়াগৰাকীয়ে যুৱক দুজনক সোধ- পোছৰ বাবে ৰ'বলৈ কোৱাত যুৱক দুজনে মটৰ চাইকেললৈ সুভাষ ৰোডেৰে পলায়ণ কৰিবলৈ ধৰাৰ সময়তে আৰক্ষীয়েও নিজৰ বাহনেৰে পিছে পিছে খেদি যায় ৷ এনে অৱস্থাত আৰক্ষীয়ে নিউ মহাৰাজা হোটেলৰ ওচৰত মটৰ চাইকেলসহ এজনক আটক কৰিবলৈ সক্ষম হয় যদিও আন এজন যুৱকে পলায়ণ কৰে ৷ পিছত আৰক্ষী বিষয়াগৰাকীৰ লগত থকা কনিষ্টবল তাপস দাসে পলায়ণ কৰা যুৱকজনৰ পিছে পিছে খেদি গৈ ৰাইজৰ সহযোগত ৰাজ্যিক পৰিবহণ নিগমৰ বাছ আস্থানৰ ওচৰত কৰায়ত্ত কৰিবলৈ সক্ষম হয় ৷ ৰাইজে যুৱকজনক কিছু উত্তম মাধ্যমো শোধায় ৷

আৰক্ষীয়ে আটকাধীন দুয়োজন যুৱকক পিছত থানালৈ নি সোধ-পোছ কৰাত যুৱক দুজনে বিভিন্ন ধন লুটৰ ঘটনাত জড়িত থকাৰ কথা স্বীকাৰ কৰা বুলি ভাৰপ্ৰাপ্ত আৰক্ষী বিষয়া জ্যোতি লাহনে সংবাদ মাধ্যমক জানিবলৈ দিছে ৷ আৰক্ষীয়ে আটকাধীন ইৰাণী গ্ৰুপৰ সদস্য দুজক অধিক জেৰা অব্যাহত ৰাখিছে ৷ ইপিনে আটকাধীন প্ৰৱঞ্চক দুজনে আৰক্ষীৰ আগত প্ৰকাশ কৰা নিজৰ নাম আৰু ঠিকনা ভুৱা বুলি আৰক্ষীয়ে সন্দেহ কৰি প্ৰকৃত তথ্য উদঘাটৰ বাবে জেৰা অব্যাহত ৰাখিছে ৷