ৰেখামনি দলেৰ নেতৃত্বত উজনি মাজুলী আঞ্চলিক পঞ্চায়ত গঠন

চিৰাম গাঁও পঞ্চায়তৰ আঞ্চলিক সদস্যা ৰেখামনি দলেক জনজাতি মহিলা আসনত সভানেত্ৰী হিচাপে অধিষ্ঠিত কৰি আজি উজনি মাজুলী আঞ্চলিক পঞ্চায়ত গঠন কৰা হয়। উজনি মাজুলী উন্নয়ন খণ্ডৰ অন্তৰ্গত ৮খন গাঁও পঞ্চায়ত ক্ৰমে জেংৰাই, চেৰপাই, ফুলনি, চিৰাম, ৰঙাচাহী, ৰতনপুৰ গায়ন, লুইতপৰীয়া আৰু ৰতনপুৰ মিৰিগাঁও পঞ্চায়তৰ নিৰ্বাচিত আঞ্চলিক পঞ্চায়ত সদস্যসকলৰ মাজত হোৱা আলোচনা সাপেক্ষে ৰঙাচাহী গাঁও পঞ্চায়তৰ আঞ্চলিক সদস্য ভৱেন নৰহে  সভানেত্ৰী হিচাপে দিয়া প্ৰস্তাৱত জেংৰাই গাঁও পঞ্চায়তৰ আঞ্চলিক সদস্য ৰাজকাপোৰ পাতিৰে সমৰ্থন জনোৱাৰ পিছত ৰেখা দলেই উজনি মাজুলী আঞ্চলিক পঞ্চায়তৰ সভানেত্ৰী হিচাপে গৃহীত হয় ।

উজনি মাজুলী উন্নয়ন খণ্ডৰ ভাৰপ্ৰাপ্ত খণ্ড উন্নয়ন বিষয়া মগেন নৰহৰ সঞ্চালনাত উজনি মাজুলী উন্নয়ন খণ্ডৰ প্ৰেক্ষাগৃহত দিনৰ ১১ বজাত অনুষ্ঠিত হোৱা অনুষ্ঠানত মাজুলী জিলাৰ অতিৰিক্ত উপায়ুক্ত নৰেন দাসে আঞ্চলিক পঞ্চায়ত গঠনৰ নীতি নিৰ্দেশনা ঘোষণা কৰাৰ যাৱতীয় কাম-কাজ অগ্ৰগতি লাভ কৰে । এই অনুষ্ঠানতে নৱ-নিৰ্বাচিত আঞ্চলিক পঞ্চায়তৰ সভানেত্ৰী ৰেখা দলে, উপ-সভানেত্ৰী মনালিছা পাতিৰসহ(ৰতনপুৰ মিৰি) ৰাজকাপোৰ পাতিৰ(জেংৰাই, মনিকা টাইদ (ফুলনি, ভৱেন নৰহ (ৰঙাচাহী), প্ৰদীপ কুমাৰ ৰিচং(ৰতনপুৰ গায়ন), অনুৰূপা পাতিৰ(চেৰপাই), প্ৰবীণ পাংগিং(লুইতপৰীয়া) আদিয়ে শপত গ্ৰহণ কৰে । মাজুলী জিলাৰ অতিৰিক্ত উপায়ুক্ত নৰেন দাসে নৱ-নিৰ্বাচিত পঞ্চায়ত প্ৰতিনিধিসকলক শপত বাক্য পাঠ কৰোৱায় ।

অনুষ্ঠানত মাজুলী জিলা আৰক্ষী অধীক্ষক হিতেশ কুমাৰ ৰয়, মিচিং স্বায়ত্ত শাসিত পৰিষদৰ কাৰ্যবাহী সদস্য নীলকান্ত দলে আদিকে ধৰি বিভিন্ন দল সংগঠনৰ লোক উপস্থিত থাকে। ইপিনে জেংৰাইত ৰিংকু পেগু দলে, চেৰপাইত বিজয় পেগু, ফুলনিত গজেন নৰহ, ৰঙাচাহীত বিৰেন কুমাৰ নাথ, ৰতনপুৰ গায়নত বিপ্ৰজ্যোতি শইকীয়া কলিতা, ৰতনপুৰ মিৰিত মনজিলিকা দলে, চিৰামত ৰমেশ বৰুৱা, লুইতপৰীয়াত মৃনালিনি গাম মিলি আদি পঞ্চায়ত প্ৰতিনিধিসকলে সংলিষ্ট গাঁও পঞ্চায়তৰ সভাপতি হিচাপে শপত গ্ৰহণ কৰি নতুন দায়িত্বভাৰ চমজি লয় ।