ৰহাত চুৰি মটৰচাইকেলসহ ২ চোৰক গ্ৰেপ্তাৰ

ৰহা আৰক্ষীৰ সফলতা৷ শনিবাৰৰ নিশা দুখন চুৰি মটৰচাইকেলসহ দুজন চোৰক আটক কৰিবলৈ সক্ষম হয়৷ চোৰ দুটা হৈছে ৰহাৰ চাপৰমুখৰ কাকতি গাঁৱৰ হবিবুৰ ৰহমান (১৮) আৰু মকচিদুল ৰহমান৷ প্ৰাপ্ত তথ্যমতে, গোপন সূত্ৰৰ পমখেদি শনিবাৰৰ নিশা ৰহা আৰক্ষী থানাৰ ভাৰপ্ৰাপ্ত বিষয়া মলয় আচাৰ্য আৰু সহপৰিদৰ্শক তনুজ দলে তথা চাপৰমুখ আৰক্ষী চকীৰ বিষয়া বিনয় ৰয়ৰ নেতৃত্বত যোৱা আৰক্ষীৰ দলটোৱে এখন নম্বৰপ্লেটবিহীন চুৰি পালছাৰ মটৰচাইকেল চাপৰমুখৰ চেইণ্ট বেছিল স্কুলৰ সন্মুখৰ পৰা  তিনিজন যুৱকে থেলি নি থকা খবৰ পাই আৰক্ষীৰ দলটোৱে অনুসৰণ কৰি কামপুৰ-চাপৰমুখ তিনিআলিৰ পৰা মটৰচাইকেলখন উদ্ধাৰ কৰিবলৈ সক্ষম হোৱাৰ লগতে দুজন যুৱকক আটক কৰিবলৈ সক্ষম হয় যদিও আনজন যুৱক পলাই সাৰিবলৈ সক্ষম হয়৷

আটকাধীন যুৱকদুজনক জেৰা কৰাত বাইকখন চুৰি কৰি অনা বুলি স্বীকাৰ কৰাৰ লগতে আন এখন নম্বৰপ্লেটবিহীন চুৰি স্প্লেণ্ডাৰ মকচিদুলৰ বাসগৃহৰ চৌহদত লুকুৱাই ৰখা বুলি স্বীকাৰ কৰে আৰু নিশাই আৰক্ষীয়ে মকচিদুলৰ বাসগৃহৰ চৌহদৰ পৰা চুৰি মটৰচাইকেলখন উদ্ধাৰ কৰিবলৈ সক্ষম হয়৷ উল্লেখ্য, হবিবুৰ ৰহমান ৰাজ্য কঁপোৱা কামপুৰৰ গেং ৰেপৰ লগত জড়িত আছিল আৰু জে'লৰ পৰা ওলাই আহি মটৰচাইকেল চুৰিৰ লগত জড়িত হৈ পৰিছিল৷ ইতিমধ্যে ৰহা আৰক্ষীয়ে দুয়োজনৰ বিপক্ষে গোচৰ নং ১০/১৯ইউ/এছ ৩৭৯ আই পি চিত গোচৰ ৰুজু কৰি তদন্ত অব্যাহত ৰাখিছে৷