মাজুলীত দীপালী বৰঠাকুৰৰ শ্ৰদ্ধাঞ্জলি অনুষ্ঠান

মাজুলী মহকুমা ছাত্ৰ সন্থাৰ অন্তৰ্গত জেংৰাই আঞ্চলিক ছাত্ৰ সন্থাই আজি সন্ধিয়া পাঁচ বজাত মাজুলীৰ ফুলনি চাৰিআলিত অসমৰ সংগীত জগতৰ ভোটাতৰা, সুকণ্ঠি গায়িকা দীপালী বৰঠাকুৰৰ বিয়োগত গভীৰ শোক প্ৰকাশ কৰি বন্তি প্ৰজ্বলনেৰে শ্ৰদ্ধাঞ্জলি জ্ঞাপন কৰে৷

ছাত্ৰ সন্থাৰ বিষয়ববীয়া তথা স্হানীয় ৰাইজে ফুলনি চাৰিআলিৰ ট্ৰেফিক পইণ্টত সমবেত হৈ বন্তি প্ৰজ্বলন কৰি সংগীত জগতৰ মহান শিল্পীগৰাকীৰ বিদেহ আত্মাৰ চিৰশান্তিৰ বাবে ভগৱানৰ ওচৰত প্ৰাৰ্থনা জনায় ।

এই শ্ৰদ্ধাঞ্জলি অনুষ্ঠানত সদৌ ছাত্ৰ সন্থাৰ কেন্দ্ৰীয় সমিতিৰ কাৰ্যনিৰ্বাহক সদস্য সূৰ্য কুমাৰ ভূঞাই অংশগ্ৰহণ কৰি কয় যে বিশিষ্ট শিল্পীগৰাকীৰ মৃত্যু অসমীয়া জাতীয় জীৱনৰ বাবে এক অপূৰণীয় ক্ষতি ৷ মাজুলী মহকুমা ছাত্ৰ সন্থাৰ সাধাৰণ সম্পাদক বিতোপন শৰ্মাই কয় যে অসমৰ হিয়াৰ আমঠু, বহুতো কালজয়ী গীতেৰে মন্ত্ৰমুগ্ধ কৰা শিল্পীগৰাকীৰ মৃত্যুৱে সমগ্ৰ অসমবাসীকে মৰ্মাহত কৰিছে ।

তেওঁৰ বিদেহ আত্মাৰ সদগতিৰ কামনাৰ লগতে ছাত্ৰ সন্থাৰ তৰফৰ পৰা বন্তি প্ৰজ্বালনেৰে শ্ৰদ্ধাঞ্জলি জ্ঞাপন কৰে ৷ অনুষ্ঠানত অংশগ্ৰহণ কৰা ফুলনিবাসী ৰাইজক আন্তৰিক ধন্যবাদ জনায় আঞ্চলিক ছাত্ৰ সন্থাৰ সভাপতি দিগন্ত বৰুৱা আৰু ভাৰপ্ৰাপ্ত সম্পাদক অবিনাশ বৰাই ৷