লাহৰীঘাটত আমছুৰ বিশাল জন জাগৰণ সভা

লাহৰীঘাটৰ পৰা শ্বামিমুল ইছলাম

সদৌ অসম সংখ্যালঘু ছাত্র ইউনিয়ন চমুকৈ (আমছু)ৰ উদ্যোগত লাহৰীঘাটত অনুষ্ঠিত হয় বিশাল জন জাগৰণ সভা । সভাত আমছুৰ কেন্দ্ৰীয় সমিতিৰ মুখ্য উপদেষ্টা আজিজুৰ ৰহমানে অতিথি হিচাপে উপস্থিত থাকি কয় যে আমছুৱে অসম চুক্তি মানি লৈ ১৯৭১ চনৰ ২৫ মাৰ্চৰ পূৰ্বৰ বৈধ নথি-পত্ৰ থকা লোকৰ পক্ষত সদায় আছে ।

তাৰ পিছত অহা লোকৰ পক্ষত আমছু কেতিয়াও থাকিব নোৱাৰে বুলি স্থিতি স্পষ্ট কৰে । লগতে কেন্দ্ৰীয় আৰু ৰাজ্য চৰকাৰৰ দুমুখীয়া স্হিতিৰো কঠোৰ সমালোচনা কৰে । লগতে কেন্দ্ৰীয় ৰে'ল ৰাজ্যমন্ত্ৰী ৰাজেন গোঁহাইক তীব্ৰ সমালোচনা কৰে ।

সভাত আমছুৰ সভাপতি ৰেজাউল কৰিম সৰকাৰে নাগৰিকত্ব সংশোধনী বিধেয়ক সম্পৰ্কত সোণোৱাল চৰকাৰখনক কঠোৰ সমালোচনা কৰে । টেঙাগুৰি মজলীয়া বিদ্যালয় খেলপথাৰত দেওবাৰে অনুষ্ঠিত জন জাগৰণ সভাত বান-গৰাখহনীয়াৰ স্হায়ী সমাধান, শিশু শ্ৰমিক, বাল্যবিবাহ, অন্ধবিশ্বাস আদিৰ বিষয়ে আলোচনা কৰা হয় ।

উল্লেখ্য যে টেঙাগুৰি আঞ্চলিক আমছুৰ উদ্যোগত আৰু মৰিগাঁও জিলা আমছুৰ সহযোগত অনুষ্ঠিত জন জাগৰণ সভাত আমছুৰ আইনী উপদেষ্টা মোস্তফা খাদ্দাম হুছেইনকে ধৰি কেন্দ্ৰীয় আৰু জিলা আমছুৰ শীৰ্ষ বিষয়ববীয়াসকল উপস্থিত থাকে ।

সভাখনত অঞ্চলটোৰ প্ৰায় ২০ সহস্ৰাধিক লোক উপস্থিত থাকে ।