বঙাইগাঁৱত অগ্নিকাণ্ডত জাহ গ'ল ব্যৱসায়িক প্ৰতিষ্ঠানৰ লক্ষাধিক টকাৰ সা-সামগ্ৰী

বঙাইগাঁও চহৰৰ পাগলাস্থান দৈনিক বজাৰৰ এখন দোকানত শুকুৰবাৰে এক অগ্নিকাণ্ড সংঘটিত হয় ৷ জানিব পৰামতে, চহৰখনৰ পাগলাস্থান বজাৰস্থিত বাদল পাল নামৰ ব্যৱসায়ীজনৰ জয়গুৰু ভাণ্ডাৰ নামৰ দোকানখনত অগ্নিকাণ্ড সংঘটিত হয় ৷

উল্লেখ্য যে পুৱা ৬.৩০মান বজাত একাংশ লোকে দোকানখনৰ ভিতৰৰ পৰা ধোঁৱা ওলোৱা প্ৰত্যক্ষ কৰি ব্যৱসায়ীজনক অৱগত কৰাতহে অগ্নিকাণ্ডৰ ঘটনাটো পোহৰলৈ আহে ৷

পিছত অগ্নি নিৰ্বাপক বাহিনী ঘটনাস্থলীত উপস্থিত হৈ অগ্নি নিৰ্বাপিত কৰে ৷ দোকানখনত কেনেকৈ অগ্নিকাণ্ডৰ সূত্ৰপাত ঘটিল সেই সন্দৰ্ভত জানিব পৰা হোৱা নাই ৷

এই অগ্নিকাণ্ডৰ ফলত দোকানখনৰ লক্ষাধিক টকা মূল্যৰ সা-সামগ্ৰী জুইত জাহ যায় ৷