ফকিৰগঞ্জৰ অপহৃত যুৱতী ৰাজস্থানত উদ্ধাৰ

ধুবুৰীৰ পৰা আমিনুৰ আহমেদ
দক্ষিণ শালমাৰা জিলাৰ ফকিৰগঞ্জৰ পৰা অপহৃত এগৰাকী ২০ বছৰীয়া যুৱতীক ৰাজস্থানৰ আলোৱা জিলাৰ ৰামসিংহ পুৰাৰ পৰা শেহতীয়াকৈ উদ্ধাৰ কৰা হৈছে ৷ ফকিৰগঞ্জৰ ৰাভাচালা গাঁৱৰ পৰা দুমাহমান পূৰ্ৱে অপহৃত হৈছিল এই যুৱতীগৰাকী । উদ্ধাৰ হোৱা যুৱতীগৰাকী ৰাভাচালা গাওঁৰ মতিয়ৰ ৰহমানৰ ছোৱালী বুলি জানিব পৰা গৈছে । যোৱা ২ অক্টোবৰত পৰিয়ালৰ গোচৰৰ নং ২৪৬/১৮ ৰ ভিত্তিত  ফকিৰগঞ্জ থানাৰ আৰক্ষীয়ে উদ্ধাৰ কৰে যুৱতী গৰাকী ।

ফকিৰগঞ্জৰ আৰক্ষী বিষয়া জ্যোতিষ গয়াৰীয়ে কনিষ্টবল কেৰামত আলী আৰু মৰ্জিনা খাতুনক লগতলৈ চলোৱা এক অভিযানৰ ভিত্তিত ১৩ অক্টোবৰত ৰাজস্থানৰ পৰা উদ্ধাৰ কৰে যুৱতীগৰাকী । আজি ফকিৰগঞ্জ থানাত হাজিৰ কৰা হয় যুৱতীগৰাকীক । গোপন সুত্ৰৰ ভিত্তিত আৰক্ষীয়ে উদ্ধাৰ কৰা যুৱতীগৰাকী সন্ধানহীন হোৱা ঘটনা সন্দৰ্ভত তদন্ত অব্যাহত ৰাখিছে আৰক্ষীয়ে ।