বৰপেটাৰ গোকুল পাঠকক সঞ্জীৱনী হাস্পতালৰ আৰ্থিক সাহায্য প্ৰদান

বৰপেটাস্থিত সঞ্জীৱনী হস্পিটেল এণ্ড ৰিছাৰ্চ সমবায় সমিতি লিমিটেডে বৰপেটাৰ মহীৰূহ, বিশিষ্ট শিল্পী, সাহিত্যিক তথা সাংবাদিক গোকুল পাঠকক আজি ১০ হেজাৰ টকাৰ আৰ্থিক সাহায্য প্ৰদান কৰাৰ লগতে তেখেতক আজীৱন বিনামূলীয়া চিকিৎসা প্ৰদানৰ দায়িত্ব লয় ৷

এই উপলক্ষে তেখেতৰ বাসগৃহত এক অনুষ্টুপীয়া অনুষ্ঠানৰ আয়োজন কৰা হয় ৷ হাস্পতালখনৰ কাৰ্যবাহী বিষয়া হিতেশ দাসে আঁতধৰা অনুষ্ঠানটোত সমবায় বিভাগৰ উপ-পঞ্জীয়ক কণ কুমাৰ শৰ্মা আৰু সঞ্জীৱনী হাস্পতালৰ সম্পাদক কিশোৰ কুমাৰ দাসে গোকুল পাঠকলৈ উক্ত সেৱা আগবঢ়োৱাৰ কথা ঘোষণা কৰে আৰু তেখেতৰ সু-স্বাস্থ্য কামনা কৰে ৷

অনুষ্ঠানত সঞ্জীৱনী হস্পিটেল এণ্ড ৰিছাৰ্চ সমবায় সমিতি লিমিটেডৰ হৈ অসম সাহিত্য সভাৰ সামাজিক মাধ্যমৰ প্ৰশাসক তথা সাংবাদিক জয়ন্ত কুমাৰ দাসে বৰেণ্য শিল্পীগৰাকীক জাপি আৰু শৰাইৰে সম্বৰ্ধনা জ্ঞাপন কৰে ৷

আনহাতে, সাংবাদিক কমলেশ বৈশ্যই সঞ্জীৱনী হাস্পতালে আগবঢ়োৱা আৰ্থিক সাহায্য প্ৰদান কৰে ৷ আজিৰ এই অনুষ্ঠানত বৰপেটাৰ সমবায় বিভাগৰ জ্যেষ্ঠ হিচাপ পৰীক্ষক ক্ৰমে ডেইজী বেগম আৰু সংগীতা দাস, কনিষ্ঠ হিচাপ পৰীক্ষক ক্ৰমে দিগন্ত দাস, হেমাংগ কুমাৰ দাস, সেউজ পৰাণ বৈশ্য, তুলিকা দাস পাটোৱাৰী, বৰ্ণিতা দাস, উদিতা চন্দ্ৰা সুত্ৰধাৰ আৰু চন্দনা দাস, সঞ্জীৱনী হাস্পতালৰ ধনৰাজ দাস আৰু ৰূপম ঠাকুৰীয়া উপস্থিত থাকে ৷

অনুষ্ঠানত গোকুল পাঠকৰ জোৱাই অৱনী কুমাৰ দাস, পুত্ৰ দীপক কুমাৰ পাঠক আৰু নাতিল'ৰা নাৰায়ণ পাঠকে সঞ্জীৱনী হাস্পতাল আৰু সমবায় বিভাগে লোৱা এই পদক্ষেপৰ বাবে ধন্যবাদ জ্ঞাপন কৰে ৷