বঙাইগাঁৱত বিভিন্ন চুৰি-ডকাইতিৰ সৈতে জড়িত ৯ জনক গ্ৰেপ্তাৰ:ন্যায়িক জিম্মালৈ প্ৰেৰণ 

#বঙাইগাঁৱৰ প্ৰতিবেদক:

বঙাইগাঁও চহৰত দিনে দিনে চোৰৰ সন্ত্ৰাস বৃদ্ধি পাই অহাৰ সময়তে বঙাইগাঁও আৰক্ষীয়ে ৯ টাকৈ চোৰক কৰায়ত্ত কৰিবলৈ সক্ষম হৈছে।চহৰখনৰ বিভিন্ন স্থানত দীৰ্ঘদিনে মোবাইল চুৰি, মহিলাৰ ডিঙিৰ পৰা সোণৰ চেইন চুৰি, মটৰ চাইকেল চুৰি,মানুহৰ ঘৰত লুট-পাট আদিকে ধৰি বিভিন্ন চুৰি আৰু ডকাইতি কাৰ্যৰ সৈতে জড়িত চোৰকেইটাক বঙাইগাঁও আৰক্ষীয়ে বিগত তিনি দিনত চহৰখনৰ বিভিন্ন স্থানৰ পৰা কৰায়ত্ত কৰে ৷ আৰক্ষীয়ে প্ৰথমে নিউ বঙাইগাঁও ভাওলাগুৰিৰ আজিদুল ইছলাম ওৰফে লাডেন(২১) আৰু  পাগলাস্থানৰ  আৰ পি এফ ক'লনীৰ ৰাজু খান(১৯)ক অভিযান চলাই গ্ৰেপ্তাৰ কৰাৰ পিছতে এই দুই চোৰৰ স্বীকাৰোক্তিৰ ভিত্তিত আন সাতটাক আটক কৰে ৷ আটকাধীন এই সাতজন হ'ল কোচ বিহাৰৰ সঞ্জু গোৱালা (২২) আৰু বিকাশ সিং( ১৮ ),নিউ বঙাইগাঁও চাইনা মাৰ্কেটৰ  ৰোশন সিং( ২৩),গেংকোৱাটাৰ এলেকাৰ কাৰ্তিক সাহা ( ৩০),ঢালিগাঁৱৰ বুদ্ধদেৱ বড়ো(১৮),পাটাচাৰকুছিৰ নচিবুল হ'ক( ১৮) আৰু ভাওলাগুৰিৰ আমিৰ হামজা(২১) ৷ আৰক্ষীয়ে চোৰৰ দলটোৰ পৰা এখন মটৰ চাইকেল,পাঁচটা মোবাইল,এটা হাতঘড়ী,মটৰ চাইকেলৰ লক খুলিবলৈ ব্যৱহাৰ কৰা সঁজুলি,বান্দৰ কেঁকোৱা আৰু কেইবা হাজাৰ টকা নগদ ধন জব্দ কৰে।উল্লেখ্য যে দুটা চোৰক এগৰাকী বৃদ্ধাই চিনাক্ত কৰে ৷ কিছুদিন পূৰ্বে বৃদ্ধাগৰাকীৰ পৰা এডাল সোণৰ চেইন কাঢ়ি লৈ গৈছিল ৷ মটৰ চাইকেলত তিনিজন যুৱক আহিছিল যদিও দুজনক চিনাক্ত কৰে বৃদ্ধাগৰাকীয়ে।ইপিনে, বঙাইগাঁও আৰক্ষীয়ে আটাইকেইজনকে গ্ৰেপ্তাৰ কৰি ১২ মাৰ্চত বঙাইগাঁও আদালতত হাজিৰ কৰোৱাত আদালতে ৯ জনকে ন্যায়িক জিম্মালৈ প্ৰেৰণ কৰে।