বৃহত্তৰ বঙাইগাঁও প্ৰেছ ক্লাবৰ অষ্টম দ্বি-বাৰ্ষিক অধিৱেশন সম্পন্ন

*ৰঞ্জিত কুমাৰ শৰ্মাক সভাপতি আৰু প্ৰণৱ কুমাৰ ডেকাক সাধাৰণ সম্পাদক হিচাপে লৈ পোন্ধৰ জনীয়া নতুন কাৰ্যনিৰ্বাহক সমিতি গঠন*

#বঙাইগাঁৱৰ প্ৰতিবেদক,১০ মাৰ্চঃ

বঙাইগাঁও অঞ্চলৰ সংবাদকৰ্মীসকলৰ উমৈহতীয়া মঞ্চ বৃহত্তৰ বঙাইগাঁও প্ৰেছ ক্লাবৰ অষ্টম দ্বি-বাৰ্ষিক সাধাৰণ অধিৱেশনখন আজি দিনজোৰা কাৰ্যসূচীৰে অনুষ্ঠিত হয় ৷ প্ৰেছ ক্লাব প্ৰাংগণত অনুষ্ঠিত অধিৱেশনৰ কাৰ্যসূচী অনুসৰি পুৱা প্ৰেছ ক্লাবৰ সভাপতি সুজিৎ কুমাৰ ৰায়ে পতাকা উত্তোলন কৰাৰ পিছতে প্ৰেছ ক্লাবৰ কাৰ্যকৰী সভাপতি তেজেশ ত্ৰিপাঠীয়ে স্মৃতি তৰ্পণ অনুষ্ঠান মুকলি কৰে৷

ইয়াৰ পিছতে অন্তিমখন কাৰ্যনিৰ্বাহক সভা অনুষ্ঠিত কৰা হয় ৷ কাৰ্যনিৰ্বাহক সভা সম্পন্ন হোৱাৰ পিছতে অনুষ্ঠিত হয় প্ৰতিনিধি আৰু বিষয় বাচনি সভা।বৃহত্তৰ বঙাইগাঁও প্ৰেছ ক্লাবৰ সভাপতি সুজিৎ কুমাৰ ৰায়ৰ সভাপতিত্বত অনুষ্ঠিত প্ৰতিনিধি সভাত সাধাৰণ সম্পাদক উপানন্দ শৰ্মাই উদ্দেশ্য ব্যাখ্যা কৰাৰ লগতে বিগত কাৰ্যকালৰ প্ৰতিবেদন পাঠ কৰে।প্ৰতিবেদনত সাধাৰণ সম্পাদকগৰাকীয়ে বিগত দুবছৰীয়া কাৰ্যকালত প্ৰেছ ক্লাবৰ তৰফৰ পৰা ৰূপায়ণ কৰা বিভিন্ন কাম-কাজৰ খতিয়ান দাঙি ধৰে৷ একেদৰে দাখিল কৰে হিচাব- নিকাচ ৷ সভাত প্ৰতিবেদন গৃহীত হোৱাৰ পাছত বিভিন্ন বিষয়  সন্দৰ্ভত আলোচনা কৰা হয়।সেইদৰে গ্ৰহণ কৰা হয় কেইবাটাও গুৰুত্বপূৰ্ণ প্ৰস্তাৱ ৷ ইয়াৰ পিছতে পুৰণি সমিতি ভংগ কৰি দিয়া হয় ৷ ইপিনে,বিষয় বাচনি সভাত ৰঞ্জিত কুমাৰ শৰ্মাক সভাপতি,প্ৰশান্ত ৰায়ক কাৰ্যকৰী সভাপতি,প্ৰণৱ কুমাৰ ডেকাক সাধাৰণ সম্পাদক,ধীৰাজ চক্ৰৱৰ্তীক সহকাৰী সম্পাদক,ধৰম ৰঞ্জন ৰয়ক সাংগঠনিক সম্পাদক,অভিদ্বীপ চৌধুৰীক কোষাধ্যক্ষ , প্ৰশান্ত ৰায়ক প্ৰচাৰ সম্পাদক আৰু ৰঞ্জিৎ দত্তক কাৰ্যালয় সম্পাদক হিচাপে লৈ ১৫ জনীয়া নতুন কাৰ্যনিৰ্বাহক সমিতিখন গঠন কৰা হয়।