বিশাল ৰেলীৰে নলবাৰীত জয়ন্ত মল্ল বৰুৱাৰ মনোনয়ন-পত্ৰ দাখিল

*বড়িগোগ বনভাগ মণ্ডল বিজেপিৰ পৰা যুৱ ভোটাৰৰ অভূতপূৰ্ব সঁহাৰি*

#দ্বিজেন ডেকা,ঘগ্ৰাপাৰ, ১০ মাৰ্চঃ

বিশাল ৰেলীৰে নলবাৰীত আজি মনোনয়ন-পত্ৰ দাখিল কৰিলে বিজেপি মিত্রজোঁটৰ প্ৰাৰ্থী,নলবাৰী সমষ্টিৰ প্ৰাক্তন বিধায়ক তথা অসম পৰ্যটন আৰু উন্নয়ন নিগমৰ অধ্যক্ষ জয়ন্ত মল্ল বৰুৱাই ৷ উল্লেখযোগ্য অহা ১ এপ্ৰিলত দ্বিতীয় পৰ্যায়ৰ নিৰ্বাচনত নলবাৰী সমষ্টিৰ পৰা ভাৰতীয় জনতা পাৰ্টী, অসম গণ পৰিষদ আৰু ইউপিপিএল দলৰ মিত্ৰজোঁটৰ মনোনীত প্ৰাৰ্থী জয়ন্ত মল্ল বৰুৱাই আজি নলবাৰী জিলা ৰিটাৰ্ণিং বিষয়াৰ ওচৰত মনোনয়ন পত্ৰ দাখিল কৰে । ইয়াৰ পূৰ্বে নলবাৰী মহাবিদ্যালয় খেলপথাৰৰ পৰা উলিওৱা এটা বৃহৎ ৰেলীৰে নলবাৰী জিলা উপায়ুক্ত কাৰ্যালয়ৰ সমীপলৈ আহি উপস্থিত হয় । মনোনয়ন-পত্ৰ দাখিল কৰিবলৈ যোৱা বৃহৎ ৰেলীত অসমৰ বিত্ত আৰু স্বাস্থ্য মন্ত্ৰী ড: হিমন্ত বিশ্ব শৰ্মা, পৰিবহণ মন্ত্ৰী চন্দ্ৰমোহন পাটোৱাৰী, জ্যেষ্ঠ অগপ নেতা তথা মন্ত্ৰী ফণীভূষণ চৌধুৰী, সাংসদ বিশ্বজিৎ দৈমাৰী, নলবাৰীৰ বিধায়ক অশোক শৰ্মা, বিজেপিৰ ৰাষ্ট্ৰীয় সম্পাদক দিলীপ শইকীয়া আৰু বৰক্ষেত্ৰীৰ বিজেপি প্ৰাৰ্থী নাৰায়ণ ডেকা উপস্থিত থাকি সংগ দিয়ে নলবাৰী বিধানসভা সমষ্টিৰ মনোনীত প্ৰাৰ্থী জয়ন্ত মল্ল বৰুৱাক।

মন্ত্ৰী ড: হিমন্ত বিশ্ব শৰ্মাই ভাষণত কয় যে আগন্তুক দিনত বিজেপি চৰকাৰ হোৱাৰ লগতে নলবাৰীৰ তিনিওটা সমষ্টিতে বিজেপিৰ প্ৰাৰ্থী বিজয় হ'ব বুলি দাবী কৰে।লগতে মন্ত্ৰীগৰাকীয়ে দেশৰ অন্য ৰাজ্যৰ তুলনাত অসম এইবাৰ প্ৰথম স্থানত থাকিব বুলি উল্লেখ কৰি আজিৰে পৰা দলীয় কৰ্মীসকলক ভোটাৰৰ ঘৰে ঘৰে যাবলৈ আহ্বান জনায়।জয়ন্ত মল্ল বৰুৱাই সংবাদ মাধ্যমৰ আগত কয় যে আজি হাজাৰ হাজাৰ ৰাইজৰ উপস্থিতি তথা সঁহাৰিয়ে প্ৰমাণ কৰিছে যে আগন্তুক দিনত বিজেপিৰ চৰকাৰ হোৱাটো নিশ্চিত।তেওঁ লগতে কয় যে নলবাৰীত প্ৰতিদ্বন্দিতাৰ কথা নাই,কেৱল ভোটৰ শতাংশ বাঢ়ি ১ লাখ ২০ হাজাৰ লাভ কৰাটো আমাৰ লক্ষ্য।উল্লেখ‍্য যে নলবাৰী সমষ্টিৰ অন্তৰ্গত তিনিটা মণ্ডলৰ পৰা কেইবা সহস্ৰাধিক লোক নলবাৰী কলেজৰ খেলপথাৰত উপস্থিত হোৱা পৰিলক্ষিত হয়।ইয়াৰ ভিতৰত ঘগ্ৰাপাৰস্থিত বড়িগোগ বনভাগ মণ্ডল বিজেপিৰ সভাপতি ডিম্বেশ্বৰ বেজবৰুৱাৰ নেতৃত্বত প্ৰায় ৭ হাজাৰ বিজেপি সমৰ্থক-কৰ্মীয়ে অংশগ্ৰহণ কৰে  বুলি জানিব পৰা যায়। ইয়াৰে ভিতৰত বড়িগোগ বনভাগ মণ্ডল বিজেপিৰ পৰা যুৱ ভোটাৰৰ সঁহাৰি অভূতপূৰ্ব দেখা পৰিলক্ষিত হয়।