হাজোৰ আন্ধুপাৰাত ছাগলীসহ দুই চোৰক আটক

বিশেষ প্ৰতিবেদক,হাজো:

হাজো আৰক্ষী থানাৰ অন্তৰ্গত আন্ধুপাৰাত ২৮ জানুৱাৰীত দিন- দূপৰতে টেম্প'সহ দুই ছাগলী চোৰক ৰাইজে হাতে-লোটে ধৰি আৰক্ষীক গতাই দিয়া ঘটনাই তীব্ৰ চাঞ্চল্যৰ সৃষ্টি কৰে।ৰাইজৰ হাতত ধৰা পৰা দুই ছাগলী চোৰ হ'ল হাজো আৰক্ষী থানাৰ অন্তৰ্গত বৰ্ণিৰ আব্দুল আলীৰ পুত্ৰ তথা টেম্প' চালক আখতাৰ হুছেইন(৩০)আৰু একে গাঁঁৱৰে লালবাহাদুৰ আলীৰ পুত্ৰ ছফিকুল আলী(২৮)।

জানিব পৰা মতে,বৃহস্পতিবাৰে দিনৰ প্ৰায় ১১ বজাত এই দুই ছাগলী চোৰে এ এছ-১৪চি/৬৪৮৭ নম্বৰৰ টেম্প খনেৰে আন্ধুপাৰাৰ পৰা বৰ্ণি দিশে আহি থকা অৱস্থাত আন্ধুপাৰাৰ ছাইফুল ইছলামৰ তিনিটা ছাগলী পথৰ কাষত এৰাল দিয়া আছিল।তেনে অৱস্থাত এই দুই ছাগলী চোৰে পথৰ কাষত টেম্প'খন ৰখাই থৈ এৰাল খুলি তিনিটা ছাগলী টেম্প'খনত ভৰাই থকাৰ সময়তে স্থানীয় একাংশ লোকে প্ৰত্যক্ষ কৰি চোৰ বুলি চিঞৰ বাখৰ কৰে।লগে লগে ছাগলীৰ গৰাকী আৰু স্থানীয় একাংশ লোক ঘটনাস্থলীলৈ দৌৰি আহে আৰু টেম্প'সহ দুই চোৰক আবদ্ধ কৰি উত্তম-মধ্যম দি আৰক্ষীক খবৰ দিয়ে।পিছত হাজো আৰক্ষী ঘটনাস্থলীত উপস্থিত হৈ ছাগলী,টেম্প'সহ দুই চোৰক আটক কৰি থানালৈ আনে।