নগাঁৱত পুত্ৰসহ মহিলা এমাহে সন্ধানহীন

নগাঁৱৰ পৰা ৱাহিদুদ জামান:

নগাঁও জিলাৰ সদৰ আৰক্ষী থানাৰ অন্তৰ্গত দক্ষিণপাট হাতীগড়ৰ এগৰাকী দুই সন্তানৰ মাতৃ পুত্ৰ সন্তানসহ বিগত এমাহে সন্ধানহীন হৈ থকা ঘটনাই চাঞ্চল্যৰ সৃষ্টি কৰিছে । জানিব পৰা মতে, দক্ষিনপাট হাতীগড় অঞ্চলৰ বিবাহিতা মহিলা তৃষ্ণা শইকীয়াই ৯ নৱেম্বৰৰ দিনৰ প্ৰায় ১১ বজাত নিজৰ সাতবছৰীয়া পুত্ৰ সন্তান যুগান্ত প্ৰতীম শইকীয়াক লগত লৈ দক্ষিণপাটত এ টি এমৰ পৰা ধন উলিয়াবলৈ যোৱাৰ পিছৰে পৰা সন্ধানহীন হৈ আছে। মহিলাগৰাকী নিশালৈকে ঘৰলৈ উভতি নহাত পৰিয়ালৰ লোকে পুত্ৰসহ মহিলাগৰাকীক বিচাৰ-খোচাৰ কৰি কোনো সন্ধান লাভ নকৰাত সেই দিনাই নিশা স্থানীয় বেবেজীয়া আৰক্ষী চকীত এজাহাৰ দাখিল কৰে। এই এজাহাৰৰ ভিত্তিত নগাঁও সদৰ থানাত ২৭৭৫/২০ নম্বৰৰ এটা গোচৰ পঞ্জীয়ন কৰি আৰক্ষীয়ে বিষয়টো সন্দৰ্ভত তদন্ত অব্যাহত ৰাখিছে যদিও পুত্ৰসহ মহিলাগৰাকীক আজিৰ তাৰিখলৈ উদ্ধাৰ কৰিবলৈ সক্ষম হোৱা নাই। লগতে মহিলাগৰাকী সন্ধানহীন হৈ থকাৰ দিনৰে পৰা তেওঁৰ ম'বাইল নম্বৰো বন্ধ হৈ আছে। বিষয়টো সন্দৰ্ভত মহিলাগৰাকীৰ পৰিয়ালৰ লোকে নগাঁও জিলা আৰক্ষী অধীক্ষকক এক আবেদনযোগে অৱগত কৰিছে। মহিলাগৰাকীয়ে ঘৰত এৰি থৈ যোৱা নৱম শ্ৰেণীত অধ্যয়নৰত এগৰাকী কন্যা সন্তান সম্প্ৰতি চিন্তাত  ভাঙি পৰাৰ লগতে অসুস্থ হৈ নগাঁও ভোগেশ্বৰী ফুকননী অসামৰিক চিকিৎসালয়ত চিকিৎসাধীন হৈ আছে । পৰিয়ালৰ লোকে মহিলাগৰাকীক উদ্ধাৰৰ বাবে বাৰে-বাৰে আৰক্ষীৰ কাষ চাপিছে যদিও আৰক্ষীয়ে বিশেষ গুৰুত্ব প্ৰদান নকৰাৰ অভিযোগ উঠিছে। পৰিয়ালৰ লোকে মহিলাগৰাকীক কোনো লোকে প্ৰেমৰ জালত ফঁচাই কোনো অজান ঠাইলৈ লৈ যোৱাৰ সন্দেহ প্ৰকাশ কৰিছে। কোনো লোকে মহিলাগৰাকীৰ সন্ধান লাভ কৰিলে আৰক্ষী বা ৯১০১৬৪৯৭৭০ আৰু ৮৬৩৮৮০৬৮১৭ নম্বৰত খবৰ দিবৰ বাবে পৰিয়ালৰ লোকে অনুৰোধ জনাইছে।