পশ্চিম উপৰ বৰভাগ আঞ্চলিক ছাত্ৰ সন্থাৰ শাৰীৰিক অক্ষম ব্ৰজেন শর্মাক হুইল চেয়াৰ প্ৰদান 

নৰেন শৰ্মা,বাহাৰঘাট:

নলবাৰী জিলাৰ বৰভাগ উন্নয়ন খণ্ডৰ অন্তৰ্গত ৫২(৬) নং গাওঁ পঞ্চায়তৰ অধীনৰ বৰকুৰিহা গাওঁৰ কৈলাশ শৰ্মাৰ একমাত্ৰ পুত্ৰ ব্ৰজেন শৰ্মা জন্মলগ্নৰ পৰা শাৰীৰিকভাৱে অক্ষম হোৱাৰ ফলত তিনিজনীয়া পৰিয়ালটোৰ আলৈ-আথানিৰ অন্ত নাইকিয়া হৈছে ৷ সাধাৰণ বেলুন, হুইচেল, মনোহাৰী দোকান কৰি পৰিয়ালৰ পোহপাল দিয়া কৈলাশ শৰ্মাও সম্প্ৰতি স্ত্ৰোক হৈ পেৰালাইছিচত আক্ৰান্ত হৈ প্ৰায় ২ বছৰ শয্যাগত। আনহাতে পত্নী দুলু দেৱীও মধুমেহ ৰোগত আক্ৰান্ত হোৱাৰ সীমাহীন দুৰ্গতিয়ে আগুৰি ধৰিছে।পৰিয়ালটোৱে জনোৱা মতে মাত্ৰ পুত্ৰ ব্ৰজেনে মাহেকীয়াভাৱে ৩০০ শ টকাকৈ সমাজ কল্যাণ বিভাগৰ পৰা লাভ কৰাৰ বাহিৰে চৰকাৰীভাৱে কোনো ধৰনৰ সাহায্য লাভ কৰা নাই ৷ উল্লেখ্য যে বিগত লোকডাউনৰ সময়ত ছাত্ৰ সন্থাই এই পৰিয়ালটোক সাহায্য দিবলৈ যোৱাত পৰিয়ালটোৱে এখন হুইল চেয়াৰ দিয়াৰ বাবে অনুৰোধ জনাইছিল ৷ সেই মৰ্মে সদৌ নলবাৰী জিলা ছাত্ৰ সন্থাৰ সহকাৰী সাধাৰণ সম্পাদক ফণীধৰ বৰুৱাই বহু কেইগৰাকী ব্যক্তিক কথাষাৰ অৱগত কৰে যদিও সঁহাৰি পোৱা নাছিল ৷ শেষত নলবাৰী আঞ্চলিক ছাত্ৰ সন্থাৰ প্ৰাক্তন ছাত্ৰনেতা চিন্ময় শৰ্মাই হুইল চেয়াৰখন নিজা ধনেৰ ক্ৰয় কৰি ছাত্ৰ সন্থাৰ জৰিয়তে পৰিয়ালবৰ্গলৈ আগবঢ়ায়৷ ফণীধৰ বৰুৱাৰ নেতৃত্বত সন্থাৰ এটা সঁজাতি দলে শুকুৰবাৰে পৰিয়ালটোত উপস্থিত হৈ হুইল চেয়াৰখন প্ৰদান কৰে। পশ্চিম বৰভাগ আঞ্চলিক উন্নতি সভাৰ সভাপতি অমূল্য চক্ৰৱৰ্তী, ছাত্ৰনেতা দিক্ষীত বৈশ্য, নলবাৰী জিলা কৰ্মচাৰী পৰিষদৰ সহকাৰী সম্পাদক প্ৰশান্ত নাৰায়ণ চৌধুৰী, প্ৰাক্তন ছাত্ৰনেতা হিমজ্যোতি ভূঞা, অঞ্জন কলিতা উপস্থিত থাকি ছাত্ৰ সন্থা আৰু চিন্ময় শৰ্মাক ধন্যবাদ জনায়৷আনহাতে,ফণীধৰ বৰুৱাই বৰক্ষেত্ৰীৰ বিধায়ক নাৰায়ণ ডেকাক উক্ত পৰিয়ালটোক উচিত সাহায্য প্ৰদান কৰিবলৈ দাবী জনায়।