চিৰাং জিলাৰ বিজনীত ড্ৰাগছসহ তিনিটা সৰবৰাহকাৰীক আটক

বঙাইগাঁৱৰ প্ৰতিবেদক: চিৰাং জিলাৰ বিজনীৰ কাৱাটিকাত মঙলবাৰে আৰক্ষীৰ অভিযানত ড্ৰাগছসহ তিনিটা সৰবৰাহকাৰীক আটক কৰা হয়।সৰবৰাহকাৰী তিনিটা ক্ৰমে ছাদ্দাম হুছেইন(২৩),ৰবিউল ইছলাম(২০) আৰু আব্দুল গণি(২২)।সৰবৰাহকাৰী তিনিটাৰ পৰা আৰক্ষীয়ে পাঁচটাকৈ ড্ৰাগছভৰ্তি কণ্টেইনাৰ,এটা খালি কণ্টেইনাৰৰ লগতে তিনিটা মোবাইল ফোন জব্দ কৰিবলৈ সক্ষম হয়।জব্দকৃত ড্ৰাগছখিনিৰ পৰিমাণ ৫.৮০ মিলি গ্ৰাম।বিজনী আৰক্ষীয়ে সৰবৰাহকাৰী তিনিটাৰ বিৰুদ্ধে ৭৫/২০২০ নম্বৰৰ গোচৰ ৰুজু কৰিছে।উল্লেখ্য যে ড্ৰাগছ বিক্ৰী কৰি থকা অৱস্থাত সৰবৰাহকাৰীকেইটাক আৰক্ষীয়ে আটক কৰে।ইয়াৰে ৰবিউল হুছেইন আৰু আব্দুল গণিৰ ঘৰ বিজনীৰ কাৱাটিকাত।আনহাতে,ছাদ্দাম হুছেইনৰ ঘৰ বঙাইগাঁও জিলাৰ হাপাচাৰাত বুলি আৰক্ষীয়ে জানিবলৈ দিয়ে।