যোগীঘোপাত অচিনাক্ত কিশোৰীৰ মৃতদেহ উদ্ধাৰ

বঙাইগাঁও জিলাৰ যোগীঘোপাৰ নিকটৱৰ্তী বালাপাৰাৰ হৰিণশূদ্ৰ বিলত পানীত ওপঙি থকা অৱস্থাত এজনী কিশোৰীৰ মৃতদেহ উদ্ধাৰ হোৱা ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে ।

প্ৰাপ্ত বাতৰি মতে, আজি দিনৰ ৩মান বজাত স্থানীয় ৰাইজে বিলৰ পানীত মৃতদেহটো ওপঙি থকা প্ৰত্যক্ষ কৰে । লগে লগে এই সম্পৰ্কে ৰাইজে যোগীঘোপা থানাত অৱগত কৰাত আৰক্ষীৰ এটা দল উক্ত স্থানত উপস্থিত হৈ ৰাইজৰ সহযোগত মৃতদেহটো উদ্ধাৰ কৰি থানালৈ আনে ।

ৰঙা ৰঙৰ চুৰিদাৰ পৰিহিত ১২/১৩ বছৰীয়া কিশোৰীগৰাকীৰ মৃতদেহটো অদ্যাপি চিনাক্ত হোৱা নাই । আন কোনো স্থানৰ পৰা মৃতদেহটো পানীৰ সোঁতত উটি অহা বুলি ৰাইজে সন্দেহ প্ৰকাশ কৰিছে ।

কিশোৰীগৰাকীৰ মৃত্যুৰ কাৰণ আত্মহত্যা, হত্যা নে দুৰ্ঘটনা সেয়া জানিব পৰা হোৱা নাই । আৰক্ষীৰ তদন্তইহে প্ৰকৃত সত্য পোহৰলৈ আনিব বুলি ৰাইজে মত পোষণ কৰিছে ।