বাহাৰঘাটৰ শিক্ষক-শিল্পী ভূপেন শৰ্মাৰ মৃত্যু

নৰেন শৰ্মা,বাহাৰঘাট:

ঘগ্ৰাপাৰ আৰক্ষী থানাৰ অন্তৰ্গত দেহাৰকুছি গাৱঁৰ এসময়ত জনপ্ৰিয় শিল্পী হিচাবে প্ৰতিষ্ঠা লাভ কৰা বিজ্ঞান শিক্ষক ভূপেন শৰ্মা(৪৮)ৰ বুধবাৰে দুপৰীয়া চিকিৎসাধীন অৱস্থাত মৃত্যু হয়৷উল্লেখযোগ্য যে দীৰ্ঘদিনৰ পৰা যকৃত ৰোগত আক্ৰান্ত শৰ্মাৰ যোৱা ১৮ নৱেম্বৰত হঠাতে স্বাস্থ্যৰ অৱনতি ঘটাত পৰিয়ালৰ লোকে ৰঙিয়াৰ এখন ব্যক্তিগত চিকিৎসালয়ত ভৰ্তি কৰাই৷তাতে চিকিৎসাধীন অৱস্থাত বুধবাৰে দুপৰীয়া তেওঁৰ মৃত্যু হয়৷ছাত্ৰ হিচাপে মেধাৱী শৰ্মাই বিজ্ঞান স্নাতক হৈ গুৱাহাটী মহানগৰীৰ এখন শিক্ষানুষ্ঠানত শিক্ষকতা জীৱন আৰম্ভ কৰে৷পৰৱৰ্তী সময়ত তেওঁ কামৰূপ জিলাৰ ডেকপাৰৰ এখন বিদ্যালয়ত শিক্ষকতা কৰাৰ পিচত মৃত্যু পৰ্যন্ত জিলাখনৰে কোঁৱৰপুৰ হাইস্কুলত বিজ্ঞান শিক্ষক হিচাপে কৰ্মৰত আছিল৷শৰ্মাৰ মৃত্যুত দেহাৰকুছি সমন্বয় নাগাৰা নামদল,দেহাৰকুছি মনসাপীঠ পৰিচালনা সমিতি,আদি কৰি বহুতো অনুষ্ঠান-প্ৰতিষ্ঠান আৰু ব্যক্তি বিশেষে গভীৰ শোক প্ৰকাশ কৰিছে৷