ভজোৰ কস্তুৰবা গান্ধী বালিকা বিদ্যালয়ত সোণাৰি প্ৰেছ ক্লাবৰ জনমুখী যাত্ৰা 

সোণাৰিৰ পৰা ঘন বৰাৰ প্রতিবেদন :

ৰূপালী জয়ন্তী বৰ্ষত ভৰি দিয়া চৰাইদেউ জিলাৰ অন্যতম পুৰণি সাংবাদিক মঞ্চ সোণাৰি প্ৰেছ ক্লাবৰ উদ্যোগত বৃহস্পতিবাৰে ভজো কস্তুৰবা গান্ধী বালিকা বিদ্যালয়ত এটি অন্তৰংগ অনুষ্ঠান অনুষ্ঠিত কৰা হয়। ৰূপালী জয়ন্তী বৰ্ষৰ লগত সংগতি ৰাখি অনুষ্ঠিত কৰা এই জনমুখী যাত্ৰা কাৰ্যসূচীত চৰাইদেউ জিলাৰ আৰক্ষী অধীক্ষক আনন্দ মিশ্ৰ মুখ্য অতিথি হিচাপে উপস্থিত থকাৰ লগতে কৃতী শিক্ষক মণি গগৈ, বিভিন্ন দল-সংগঠনৰ নেতৃবৰ্গ আৰু সোণাৰি প্ৰেছ ক্লাবৰ সাংবাদিক সকল উপস্থিত থাকি আৱাসিক বিদ্যালয়খনৰ ছাত্ৰী সকলৰ লগত মত বিনিময় কৰে। উল্লেখ্য  যে দৰিদ্ৰ পৰিয়ালৰ কন্যা সন্তানক শিক্ষাদান কৰাৰ উদ্দেশ্যে স্থাপন কৰা এই শিক্ষানুষ্ঠানখন সাধাৰণতে লোকচক্ষুৰ পৰা আঁতৰতেই থাকি যায় নাইবা ইয়ালৈ বাহিৰৰ মানুহৰ আহ-যাহ তুলনামূলকভাৱে কম হোৱা হেতুকে জনসাধাৰণৰ মাজত এই শিক্ষানুষ্ঠান খনৰ অভাৱ-অভিযোগ দেখা নাযায় তথা অধ্যয়নৰত ছাত্ৰী সকলৰ প্ৰতিভাই পূৰ্ণতা নাপায়। ইয়াৰ পৰিপ্ৰেক্ষিতত  সোণাৰি প্ৰেছ ক্লাবে জনমুখী যাত্ৰা কাৰ্যসূচীৰ জৰিয়তে ছাত্ৰী সকলৰ মনোভাৱ তথা শিক্ষানুষ্ঠানখনৰ অভাৱ-অভিযোগ আৰু পৰিচালনা ব্যৱস্থা সন্দৰ্ভত বুজ ল'বলৈ  প্ৰয়াস কৰাৰ লগতে ছাত্ৰীসকলৰ মাজত চেনিটাৰী নেপকিন, শৈক্ষিক তথা নিত্য প্ৰয়োজনীয় সামগ্ৰী বিতৰণ কৰে। আনহাতে অধ্যয়নৰত ছাত্ৰীসকলৰ দ্বাৰা পৰিৱেশন কৰা নৃত্য-গীতে অনুষ্ঠানটি জীপাল কৰি তোলে ।