মৰিগাঁৱত টাটা কনচালটেনচি চাৰ্ভিচৰ ১৮ দিনীয়া দক্ষতা বিকাশ প্ৰশিক্ষণ শিবিৰ আৰম্ভ

মৰিগাঁৱৰ পৰা জিতুমনি নাথৰ প্রতিবেদন : 

মৰিগাঁও জিলা প্ৰশাসনৰ উদ্যোগত আৰু যোৰহাটৰ মডেল কেৰিয়াৰ সহযোগত মৰিগাঁও কলা বিথিকাৰ প্ৰেক্ষাগৃহত বৃহস্পতিবাৰৰ পৰা ১৮ দিনীয়াকৈ বহুজাতিক প্ৰতিষ্ঠাণত নিযুক্তি লাভৰ সুবিধাৰ্থে ছাত্ৰ ছাত্ৰীৰ মাজত এক দক্ষতা বিকাশৰ প্ৰশিক্ষণ শিবিৰ আৰম্ভ হৈছে। মৰিগাঁও জিলা উপায়ুক্ত ঋতুৰাজ বৰাৰ বিশেষ তৎপৰতাত কলিকতাৰ টাটা কনচালটেনচি চাৰ্ভিচে (টি চি এছ ) প্ৰশিক্ষণ  আগবঢ়োৱা   দক্ষতা বিকাশৰ এই প্ৰশিক্ষণত ২০১৫ চনৰ পৰা ২০১৯ চনৰ ভিতৰৰ ক'লা,বিজ্ঞান,বানিজ্য  শাখাত স্নাতক উৰ্ত্তীণ হোৱা ছাত্ৰ ছাত্ৰী সকলক সামৰি লোৱা হৈছে। প্ৰশিক্ষণৰ সময়ছোৱাত কমিউনিকেটিভ ইংলিছ,কৰ্পৰেট এন্টিকুইট এণ্ড চৰ্ফট স্কীল,বেছিক কম্পিউটাৰ নলেজ আদি বিষয় সমূহ সামৰি লোৱা হ'ব। প্ৰশিক্ষণৰ অন্তত সফলতা অৰ্জন কৰা ছাত্ৰ ছাত্ৰী সকলে বহুজাতিক প্ৰতিষ্ঠাণত নিযুক্তি লাভৰ সম্ভাৱনা থাকিব। এই উপলক্ষে দক্ষতা বিকাশ প্ৰশিক্ষণটোৰ এক উদ্ধোধনী অনুষ্ঠান বৃহস্পতিবাৰে অনুষ্ঠিত হৈ যায়। জিলা উপায়ুক্ত ঋতুৰাজ বৰাই প্ৰশিক্ষণ শিৱৰটো উদ্ধোধন কৰি দিয়া ভাষণত কয় দক্ষতা নাথাকিলে সমাজত স্থান পাবলৈ বহু কষ্ট কৰিব লগাত পৰে। সমাজৰ প্ৰতিজন মানুহৰে কিবা নহয় কিবা এটা দক্ষতা আছে। কাৰোবাৰ দক্ষতা প্ৰকাশিত হয় কাৰোবাৰ দক্ষতা সুপ্ত হৈ থাকে। মৰিগাঁৱৰ ছাত্ৰ ছাত্ৰী সকলৰ মাজতো  নিশ্চয় দক্ষতাৰ অভাব নাই। সেয়ে সুপ্ত হৈ থকা দক্ষতা সমূহ বিকাশ কৰোৱাই এই প্ৰশিক্ষণৰ অন্যতম উদ্দেশ্যে বুলি মন্তব্য কৰি ইয়াৰ জৰিয়তে ছাত্ৰ ছাত্ৰী সকলে নিজৰ দক্ষতা বিকাশৰ সুবিধা লাভ কৰিবলৈ সক্ষম হ'ব বুলিও উপায়ুক্ত গৰাকীয়ে আশা প্রকাশ কৰে। অতিৰিক্ত উপায়ুক্ত ডা০ তহিদুৰ ৰহমানে আঁত ধৰা অনুষ্ঠানটোত মৰিগাঁও জিলা পৰিষদৰ মুখ্যকাৰ্যবাহী বিষয়া কিশোৰ ঠাকুৰীয়া,মৰিগাঁও মহাবিদ্যালয়ৰ অধক্ষ্য ড° লীলাকান্ত বৰঠাকুৰ, ইণ্ডিয়ান কেন্সাৰ চছাইটিৰ বিষয়া দেৱাশীষ শৰ্মা,মৰিগাঁও জিলা সাংবাদিক সংস্থাৰ সভাপতি প্ৰতাপ হাজৰিকা,সাংবাদিক দালিম ফুকন,ঘগুৱা হাইস্কুলৰ প্ৰধান শিক্ষক লেনিন ডেকাই ছাত্ৰ ছাত্ৰী সকলক শুভেচ্ছা মূলক ভাষণ প্ৰদান কৰা অনুষ্ঠানটোত টাটা কনচালটেনচি চাৰ্ভিচৰ প্ৰশিক্ষক অৰুণ নাকছাৰ,যোৰহাটৰ মডেল কেৰিয়াৰ বিষয়া ধ্ৰুৱজ্যোতি গগৈ,মৰিগাওঁ জিলা সাংবাদিক সংস্থাৰ প্ৰাক্তন সভাপতি বিৰিঞ্চি কুমাৰ শৰ্মা,নিৰ্বাচন বিষয়া পল্লব জ্যোতি দাস,অতিৰিক্ত আয়ুক্ত মৈত্ৰীৰ মৰাণ,দেৱাহুতি ডেকাকে আদি কৰি জিলা প্ৰশাসনৰ বিষয়া কৰ্মচাৰী সকলেও অংশগ্ৰহণ কৰে।উল্লেখ্য যে দক্ষতা বিকাশৰ এই প্ৰশিক্ষণটোত জিলা খনৰ বিভিন্ন প্ৰান্তৰ ৯১ জন ছাত্ৰ ছাত্ৰীয়ে অংশগ্ৰহণ কৰিছে।