নোনা নদীত অবৈধ বালি খনন বালি মাফিয়াৰ

ৰঙিয়াৰ বটাকুছিৰ ওচৰেৰে বৈ যোৱা নোনা নদীৰ পাৰত অবৈধ বালি খনৰৰ এক দৃশ্য নিউজ এএছএনৰ কেমেৰাত বন্দী হৈছে ৷ ৰঙিয়া বন বিভাগৰ দুৰ্বল ভূমিকাৰ বাবে নোনা নদীৰ পাৰত অবৈধভাৱে বালি মাফিয়াৰ এটা বৃহৎ চক্ৰই খনন আৰম্ভ কৰিছে ।

বছৰ বছৰ ধৰি বন বিভাগৰ লগত বুজাবুজি কৰি ৰাজহ ফাঁকি দি নদীত বালি খননকাৰ্য চলাই আছে এই বৃহৎ চক্ৰটোৱে । ৰঙিয়া বন বিভাগৰ বিভিন্ন কথা সঘনাই চৰ্চালৈ অহাৰ সময়ত বন বিভাগটোৰ বিষয়া-কৰ্মচাৰীয়ে চকুমুদা কুলিৰ ভাও ধৰাটো ৰহস্যজনক । বালি মাফিয়াৰ সৈতে বুজাবুজি থকাৰ বাবে বন বিভাগে অবৈধ খননকাৰ্য উৎখাত কৰিবলৈ সাহস কৰা নাই বুলি ৰাইজে মত প্ৰকাশ কৰে ।

তাৰফলত চৰকাৰে লাখ লাখ টকা ৰাজহ হেৰুৱাবলগীয়া হৈছে । পৰিৱৰ্তনকামী মিত্ৰজোঁট চৰকাৰখনে দুৰ্নীতিৰ ক্ষেত্ৰত শূন্য সহনশীলতাৰ নীতি গ্ৰহণ কৰাৰ সময়ত নোনা নদীত চলি থকা অবৈধ বালি খননকাৰ্য বন্ধ কৰিব পাৰিবনে বুলিও সচেতন মহলে প্ৰশ্ন কৰিছে ৷ ৰঙিয়াত এনে বহুকেইটা ঠাইত গোপনে বালি খননকাৰ্য চলি থকাৰ পিছতো বন বিভাগে পদক্ষেপ নোলোৱাটো ৰহস্যজনক । বন বিভাগ আৰু দুৰ্নীতিৰ ক্ষেত্ৰত শূন্য সহনশীলতাৰ নীতি গ্ৰহণ কৰা চৰকাৰখনে কি পদক্ষেপ লয় সেয়া সময়তহে লক্ষণীয় হ'ব ।