এল আই চি মণ্ডল কেৰমত সূৰুষ-জুই চূড়ান্ত বিজয়ী

ভাৰতীয় জীৱন বীমা নিগমৰ গুৱাহাটী মণ্ডলৰ নগাঁও শাখাৰ অধীনত নগাঁও ক্ৰীড়া সংস্থাৰ সহযোগত আয়োজিত পূব মণ্ডল কেৰম প্ৰতিযোগিতাখনিৰ বৃহস্পতিবাৰে সামৰণি পৰে ৷

প্ৰতিযোগিতাৰ পুৰুষৰ একক শাখাত নগাঁৱৰ সূৰুযউদ্দিন আহমেদ আৰু মহিলাৰ একক শাখাত কলকাতাৰ মেট্ৰ’ মণ্ডলৰ (২নং) জুই দত্তই চূড়ান্ত বিজয়ীৰ সন্মান অৰ্জন কৰে ৷

পুৰুষৰ ফাইনেলত সূৰুযউদ্দিন আহমেদে গুৱাহাটী মণ্ডলৰ মাধৱ শ্বাহক ২-০ গেমত পৰাস্ত কৰাৰ বিপৰীতে মহিলাৰ ফাইনেলত জুই দত্তই কলকাতাৰ ছাব আৰবান মণ্ডলৰ পিয়লি চক্ৰৱৰ্তীক ২-০ গেমত পৰাস্ত কৰে ৷

উল্লেখ্য যে বুধবাৰে অসম কেৰম সংস্থাৰ সম্পাদক প্ৰদীপ কুমাৰ হাজৰিকাই উদ্বোধন কৰা অনুষ্ঠানত ভাৰতীয় জীৱন বীমা নিগমৰ বিষয়া পি কে বল, এ শৰ্মা, এছ চি ধৰ, টি গাথিৰী, অৰ্পণ পাকৰন্নী, স্বপন ৰয়ৰ উপৰি ৰাষ্ট্ৰীয় পৰ্যায়ৰ (কেৰম) আম্পায়াৰ অসীম ভাৱাল উপস্থিত থাকে ৷

প্ৰতিযোগিতাখনিত পূব মণ্ডলৰ দহটা সংমণ্ডলৰ পুৰুষ-মহিলাৰ মুঠ ২৫গৰাকী প্ৰতিযোগীয়ে যোগদান কৰে ৷