কুমাৰীকাটাত ক্ৰেছাৰ মিলে মাতিছে বিপদ

ভাৰতৰ চুবুৰীয়া ৰাষ্ট্ৰ ভূটান পাহাৰৰ পৰা নামি আহ কালানদীৰ বাঢ়নী পানীয়ে বাক্সা জিলাৰ তামুলপুৰ মহকুমাৰ অন্তৰ্গত কুমাৰীকাটা ভালুকঝাৰ গাঁৱত সৃষ্টি কৰা ব্যাপক গৰাখহনীয়াই টোপনি হৰণ কৰিছে নৈপৰীয়া ৰাইজৰ ৷

গাঁওখনৰ ৰাইজৰ অভিযোগ অনুসৰি নদীটোৰ মাজত যোৱা দুবছৰমান আগতে মজনুৰ আলী নামৰ লোক এজনে এটা ক্ৰেছাৰ মিল স্থাপন কৰিছিল । এই ক্ৰেছাৰ মিল স্থাপন কৰি তেখেতে ভালুকঝাৰ গাঁওখনৰ ফালে নৈখনৰ পৰা শিল খান্দি নি থকাৰ ফলত সেইফালে নদীটো ক্ৰমাৎ দ হৈ যোৱাৰ ফলতে খহনীয়াৰ সৃষ্টি হৈছে৷

যাৰফলত কেইবাটাও পৰিয়ালৰ গছ-গছনিৰ লগতে মাটি-বাৰীও খহনীয়াত জাহ যায় । গাঁওখনৰ ৰাইজে জানিবলৈ দিয়ামতে, গাওঁখনৰ কাষেৰে বৈ যোৱা কালানদীটোৰ পূবফালৰ পাৰৰ দিশে শিল খান্দিবলৈ বাধা দিছিল যদিও সেই কথা তমিলৰ মালিকে গুৰুত্ব নিদিলে ।

উপায়ন্তৰ হৈ ৰাইজে কিছু দিন পূৰ্বে টকা-পইচা তুলি এখন জেচিপিৰে খান্দি নৈখনৰ গতিপথ সলাবলৈ বিচাৰিছিল যদিও মজনুৰ আলীয়ে ৰাইজক বাধা প্ৰদান কৰে । এতিয়া মজনুৰ আলীৰ এই কাণ্ডত গাঁওখনৰ ৰাইজ জাঙুৰ খাই উঠি প্ৰশ্ন উত্থাপন কৰিছে যে নৈৰ বুকুত ক্ৰেছাৰ মিলি বহুৱাবলৈ চৰকাৰে তেওঁক কেনেদৰে অনুমতি প্ৰদান কৰিলে ।

এই ক্ৰেছাৰ মিলৰ বাবেই নৈৰ বাঢ়নী পানীয়ে উক্ত গাঁওখনত বৰ্তমান ব্যাপক ক্ষতিসাধন কৰিছে ৷ তথাপিও চৰকাৰী পক্ষই কোনোধৰণৰ পদক্ষপ নোলোৱাৰ অভিযোগ উত্থাপন কৰিছে ৰাইজে ৷ খহনীয়াই কাল ৰূপ ধাৰণ কৰাৰ পিছতো অঞ্চলটোৰ হিতৰ বাবে চৰকাৰে কোনো ব্যৱস্থা নোলোৱাত ক্ষোভিত হৈ পৰিছে ৰাইজ ৷

এই ক্ষেত্ৰত বিভাগীয় কৰ্তৃপক্ষই কথাটো গুৰুত্বসহকাৰে লৈ ক্ৰেছাৰ মিলটোৰ বিৰুদ্ধে শীঘ্ৰে ব্যৱস্থা গ্ৰহণ কৰিবলৈ দাবী জনাইছে ৷ অন্যথা খহনীয়াৰ কৱলত পৰা বৃহৎ অঞ্চলটো কিছুদিনৰ ভিতৰতে নিশ্চিহ্ন হোৱাৰো সন্দেহ ঘনীভূত হৈ পৰিছে ৷

উল্লখ্য যে এই খহনীয়াত ইতিমধ্যে গাঁওখনৰ আকবৰ আলী, চামচুল আলী, বাবুল আলী আৰু মছিবুৰ ৰহমানৰ মাটি-বাৰী, গছ-গছনি নদীৰ বুকুত জাহ গৈছে ৷