সংসদৰ শীতকালীন অধিবেশনত আলোচনা নহয় নাগৰিকত্ব (সংশোধনী) বিধেয়কৰ ওপৰত

বহু চৰ্চিত আৰু সমালোচিত নাগৰিকত্ব (সংশোধনী) বিধেয়ক, ২০১৬ সংসদৰ আগন্তুক শীতকালীন অধিবেশনত আলোচনাৰ বাবে গ্ৰহণ কৰা নহয় ৷ সংসদৰ দুয়ো সদনতে এই বিষয়ত কোনো ধৰণৰ আলোচনা নহয় বুলি জানিব পৰা গৈছে ৷

উল্লেখ্য যে যুটীয়া সংসদীয় সমিতিয়ে এই বিধেয়কখনৰ ওপৰত পৰীক্ষা-নিৰীক্ষা কৰি এক প্ৰতিবেদন প্ৰস্তুত কৰি সংসদৰ শীতকালীন অধিবেশনত উত্থাপনৰ জৰিয়তে ইয়াক গৃহীত কৰাৰ প্ৰস্তুতি প্ৰায় সম্পূৰ্ণ কৰিছিল ৷

কিন্তু বিধেয়কখনক লৈ সৰ্বত্ৰ বিতৰ্ক আৰু সমালোচনাৰ লগতে বিধেয়কখন সংসদত উত্থাপন কৰিলে বিভিন্ন দল-সংগঠনৰ পৰা প্ৰতিবাদৰ সন্মুখীন হোৱাৰ আশংকাতেই ইয়াৰ ওপৰত আলোচনা নকৰাৰ সিদ্ধান্ত গ্ৰহণ কৰা বুলি অনুমান কৰা হৈছে ৷

আনহাতে, এই বিধেয়কৰ ওপৰত আলোচনা কিম্বা ইয়াক গ্ৰহণৰ ব্যৱস্থা কৰিলে আগন্তুক লোকসভা নিৰ্বাচনত বিজেপিৰ ওপৰত কুপ্ৰভাৱ পৰাৰ আশংকা কৰিও ইয়াক সংসদৰ অধিবেশনৰ কাৰ্যক্ৰমৰ পৰা বাহিৰত ৰখা বুলি এতিয়া বহুতে মন্তব্য প্ৰকাশ কৰিছে ৷