জেংৰাইত নিজাববীয়াকৈ প্ৰাৰ্থী দিয়াৰ সিদ্ধান্ত গণশক্তিৰ : আসন বুজাবুজিৰ ঘোষণা

মাজুলীৰ পৰা ৰাজীৱ পাতিৰ

মাজুলীৰ জেংৰাই গাওঁ পঞ্চায়তৰ সভাপতিৰ লগতে সাতটা ৱাৰ্ড সদস্যৰ আসন শাসকীয় বিজেপি দলে মিত্ৰ দল গণশক্তিক এৰি দিলেও আঞ্চলিক সদস্যৰ আসন বঞ্চিত তথা মিত্ৰতা কৰাক লৈ আজি জেংৰাইমুখত গণশক্তিৰ সমৰ্থকসকলে এক উত্তপ্ত পৰিস্থিতিৰ সৃষ্টি কৰে । পূৰ্বৰ সিদ্ধান্ত মতে দলটোৰ প্ৰাৰ্থীসকলৰ মনোনয়ন-পত্ৰ সংশ্লিষ্ট কাৰ্যালয়ত জমা দিয়াৰ বাবে বিভিন্ন ৱাৰ্ডৰ পৰা শতাধিক কৰ্মী তথা সমৰ্থকসকলে পুৱাই জেংৰাইমুখত উপস্থিত হয় ।

কিন্তু কালি নিশা বিজেপি আৰু গণশক্তি দলৰ দুয়ো প্ৰতিনিধিৰ মাজত মাজদেউৰীত অনুষ্ঠিত সভাত লোৱা মিত্ৰতাৰ আসন বুজাবুজি চূড়ান্ত হোৱাৰ পিছত সৃষ্টি হোৱা পৰিস্থিতিৰ বাবে মনোনয়ন-পত্ৰ জমা দিয়া নহ'ল । মিত্ৰতা কৰি আঞ্চলিক সদস্য পদ গণশক্তিয়ে বিজেপিক এৰি দিয়া আৰু সিদ্ধান্ত মতে মনোনয়ন নিদিয়া আদি লৈ ক্ষোভৰ বহিঃপ্ৰকাশ ঘটে দলটোৰ কৰ্মীৰ মাজত ।

পৰিস্থিতিৰ প্ৰতি লক্ষ্য ৰাখি গণশক্তিৰ এক গুৰুত্বপূৰ্ণ সভা আজি আবেলি জেংৰাইমুখত অনুষ্ঠিত হয় । আসন্ন পঞ্চায়ত নিৰ্বাচনত জেংৰাই গাওঁ পঞ্চায়তত গণশক্তিয়ে নিজাববীয়াকৈ প্ৰাৰ্থী থিয় কৰোৱাৰ সিদ্ধান্ত গ্ৰহণ কৰে ।

ইপিনে আসন্ন পঞ্চায়ত নিৰ্বাচনত বিজেপি আৰু গণশক্তি দুয়ো দলৰ মাজত হোৱা আলোচনাৰ সিদ্ধান্তমতে মাজুলীৰ বিভিন্ন গাওঁ পঞ্চায়ত ক্ৰমে ৰতনপুৰ মিৰি, চেৰপাই, জেংৰাই আৰু শ্ৰীলোহিত গাওঁ পঞ্চায়তত সভাপতি, লোহিত পৰীয়া, ফুলনি, পকাজৰা আৰু কৰতিপাৰ গাওঁ পঞ্চায়তত আঞ্চলিক সদস্য আৰু উজনি মাজুলী জিলা পৰিষদৰ আসন বিজেপি দলে গণশক্তি দলক এৰি দিয়া বুলি গণশক্তিৰ নেতা নীলকান্ত দলেই জানিবলৈ দিছে । বাকী অন্যান্য গাওঁ পঞ্চায়তসমূহত বিজেপি দলে সভাপতি, আঞ্চলিক সদস্য আৰু তিনিখন জিলা পৰিষদ পদত প্ৰাৰ্থিত্ব আগবঢ়াব । 

উজনি মাজুলী ব্লক কংগ্ৰেছৰ প্ৰাৰ্থী ঘোষণা

বিৰোধী দল কংগ্ৰেছে আসন্ন পঞ্চায়ত নিৰ্বাচনৰ বাবে উজনি মাজুলীৰ গাঁও পঞ্চায়তত প্ৰাৰ্থী ঘোষণা কৰিছে । জেংৰাইৰ সভানেত্ৰী পদত মায়া দলে, আঞ্চলিক সদস্য পদত সত্য দলে, চেৰপাই সভাপতি পদত বিজয় কুমাৰ দেউৰী, আঞ্চলিক সদস্য পদত বিজয়লক্ষী দেউৰী, ৰতনপুৰ গায়ন পদত সভানেত্ৰী সুৱৰ্ন তামূলী, আঞ্চলিক সদস্য পদত বালমিকী নৰহ, শ্ৰীৰাম সভাপতি পদত ৰিশ্বেশ্বৰ খাউণ্ড,

আঞ্চলিক সদস্যা পদত জ্যোতিমায়া পেগু, ৰতনপুৰ মিৰি সভানেত্ৰী পদত ইন্দিৰা দলে পেগু, আঞ্চলিক সদস্য পদত গীতাঞ্জলি পাতিৰ দলে, লোহিত পৰীয়াত সভানেত্ৰী পদত প্ৰমিলা দলে গাম, আঞ্চলিক সদস্য পদত ভোলানাথ মিলি, ৰঙাচাহীত সভাপতি পদত বলোৰাম নাথ আৰু আঞ্চলিক সদস্য পদত অজিত ঙাটেক প্ৰাৰ্থিত্ব আগবঢ়াইছে ।