কামপুৰৰ বকুলগুৰিত ৰাইজে নিৰ্মাণ কৰিলে উপপথ

চৰকাৰলৈ বাট নাচাই কামপুৰৰ বকুলগুৰিত কপিলী নদীয়ে কালৰূপ ধাৰণ কৰা খহনীয়া এলেকাত ৰাইজে নিৰ্মাণ কৰিছে এটা উপপথ ৷ অসম সংখ্যালঘূ সংগ্ৰাম পৰিষদৰ বকুলগুৰি আঞ্চলিক, কৃষক মুক্তি সংগ্ৰাম সমিতিয়ে স্থানীয় ৰাইজৰ সহযোগত ৰাইজৰ পৰা এক-দুই টকাকৈ অনুদান সংগ্ৰহ কৰি নিৰ্মাণ কৰিছে এই উপপথটি ৷

বিগত বাৰিষাত কপিলী নদীৰ খহনীয়াত জাহ গৈছিল বকুলগুৰি গড়কাপ্তানী পকী পথটো ৷ ইতিমধ্যে উক্ত খহনীয়া স্থানত এগৰাকী প্ৰসূতীয়ে পথৰ দুৰৱস্থাৰ বাবে পথৰ ওপৰতে সন্তান প্ৰসৱ কৰিছিল ৷

ইফালে দিলীপ বৰা নামৰ এজন লোকে চাইকেলৰ পৰা পৰি উক্ত স্থানত কৰুণ মৃত্যুক সাৱটি লোৱাৰ লগতে কেইবাটাও দুৰ্ঘটনা হোৱাৰ পাছতো স্থানীয় বিধায়কৰ লগতে চৰকাৰে কোনো গুৰুত্ব প্ৰদান নকৰিলে ৷

যাৰবাবে চৰকাৰলৈ বাট নাচাই ৰাইজৰ দান-বৰঙণিৰে এটা উপপথ নিৰ্মাণ কৰি ৰহাৰ বিধায়কক তীব্ৰ সমালোচনা কৰে ৷ ৰহা সমষ্টিত বিধায়কে কাম কৰিব নালাগে বুলিও মন্তব্য কৰে স্থানীয় ৰাইজে ৷