ঘগ্ৰাপাৰত নন্দগাঁঁৱৰ যুৱকৰ মৃতদেহ উদ্ধাৰ:চোকা অস্ত্ৰৰে আঘাত কৰি হত্যা 

দ্বিজেন ডেকা,ঘগ্ৰাপাৰ:

নলবাৰী জিলাৰ ঘগ্ৰাপাৰ আৰক্ষী থানাৰ অন্তৰ্গত চত্ৰাত মঙলবাৰে পুৱা এজন যুৱকৰ ক্ষত-বিক্ষত অৱস্থাত  মৃতদেহ উদ্ধাৰ হোৱা ঘটনাই অঞ্চলটোত চাঞ্চল‍্যৰ সৃষ্টি কৰিছে।উদ্ধাৰ হোৱা মৃতদেহটো নলবাৰী সদৰ থানাৰ অন্তৰ্গত নন্দগাঁও নিৱাসী প্ৰয়াত মুহি দত্ত শৰ্মাৰ পুত্ৰ ৰিংকুমণি শৰ্মা (৩৯)ৰ বুলি আজি সন্ধিয়া চিনাক্ত কৰা হৈছে।চত্ৰা গাঁৱৰ মুকলি পথাৰখনত থকা জলসিঞ্চন বিভাগৰ এটা চেনেলত পৰি থকা অৱস্থাত আজি পুৱা স্থানীয় ৰাইজে মৃতদেহটো প্ৰত‍্যক্ষ কৰি আৰক্ষীক খবৰ দিয়ে।চোকা অস্ত্ৰৰে হত্যা কৰা মৃতদেহটো উদ্ধাৰ কৰাৰ পিছত এয়া এক পৰিকল্পিত  হত্যাকাণ্ড বুলি ৰাইজে সন্দেহ প্ৰকাশ কৰিছে। ঘটনাস্থলীত ঘগ্ৰাপাৰ আৰক্ষী উপস্থিত হৈ মৃতদেহটো মৰণোত্তৰ পৰীক্ষাৰ বাবে নলবাৰী শ্বহীদ মুকুন্দ কাকতি অসামৰিক চিকিৎসালয়লৈ প্ৰেৰণ কৰে যদিও মৰ্গত থকা অৱস্থাত পৰিয়ালৰ লোকে ৰিংকু মনি শৰ্মাক চিনাক্ত কৰে।সোমবাৰে সন্ধিয়াৰে পৰা সন্ধানহীন হৈ থকা যুৱকজনৰ মৃতদেহ আজি ঘগ্ৰাপাৰত উদ্ধাৰ হোৱা ঘটনাক কেন্দ্ৰ কৰি আৰক্ষীয়ে জোৰ তদন্ত অব্যাহত ৰাখিছে।