জুৰীয়াত বন বিভাগৰ অভিযান:দুটা অবৈধ কাঠফলা মিল জব্দ 

নগাঁৱৰ পৰা ৱাহিদুদ জামান:

নগাঁও বন সংমণ্ডল বিষয়া ৰাজেন চৌধুৰীৰ নিৰ্দেশ মৰ্মে জিলা বন সুৰক্ষা শাখাৰ বনাঞ্চলিক বিষয়া চেমিম আখতাৰৰ নেতৃত্বত অহা এটা বন বিভাগৰ অভিযানকাৰী দলে মঙলবাৰে জুৰীয়া অঞ্চলৰ কেইবাখনো ঠাইত অভিযান চলাই দুটাকৈ অবৈধ কাঠ ফলা মিল জব্দ কৰিবলৈ সক্ষম হয় ৷ জব্দ কৰা অবৈধ কাঠফলা মিল দুটা দীৰ্ঘদিন দিন ধৰি জুৰীয়াৰ মাহগুৰি গাঁৱত ৰছিদুল হক আৰু তিনিচুকীয়াৰ কাষৰীয়া জুকাটি গাঁৱত ফাইজুল হকে চোৰাং কাঠ ব্যৱসায়ীৰ সহযোগত অবৈধভাৱে চলাই আহিছিল৷ এই খবৰ লাভ কৰি সোমবাৰে বিয়লিৰ ভাগত বন বিভাগৰ দলটোৱে  অভিযান চলাই অবৈধ মিল দুটা জব্দ কৰে। উক্ত অভিযানত বন পালক ক্ৰমে ৰঞ্জন বৰা, নৃপেন বৰা, গোলাপী দেৱী, বন কৰ্মী গুপ্ত বৰা, গৌতম বৰা, মুক্তাৰ হুছেইন আদি উপস্থিত থাকে ৷