আজি আহোমসকলৰ পৱিত্ৰ মে-ডাম-মে-ফি:মুখ্যমন্ত্ৰীয়ে জনালে শুভেচ্ছা

তাই আহোমসকলৰ আজি পৰম্পৰাগত পৱিত্ৰ মে-ডাম-মে-ফি।সম্পূৰ্ণ আহোম জনগোষ্ঠীয় পৰম্পৰাৰে পূজা আগবঢ়াই আজিৰ দিনটোত স্মৰণ কৰা হয় আহোমসকলৰ পূৰ্বপুৰুষ তথা উপৰিপুৰুষসকলক।তাই ভাষাৰ শব্দ মে-ডাম-মে-ফিৰ সম্পূৰ্ণ অৰ্থ হৈছে মে-মানে পূজা,ডাম-মৃতক বা উপৰিপুৰুষ, ফি-মানে দেৱতা অৰ্থাৎ স্বৰ্গ দেৱতা আৰু উপৰিপুৰুষসকলক দিয়া পূজা।সাত ৰাজ মাৰি এটা বৃহৎ অসমীয়া জাতি গঠন কৰা প্ৰধান পুৰুষ চাওঁলুং চুকাফাৰ দিনৰে পৰা পালন কৰি অহা হৈছে মে-ডাম-মে-ফি। পূৰ্বৰ বছৰসমূহৰ দৰে এইবাৰো ৰাজ্যৰ ভিন্ন প্ৰান্তত দিনজোৰা কাৰ্যসূচীৰে পালন কৰা হৈছে মে-ডাম-মে-ফি।আহোমৰ প্ৰথমখন স্থায়ী ৰাজধানী চৰাইদেউত কেন্দ্ৰীয়ভাৱে আয়োজন কৰা হৈছে মে-ডাম-মে-ফি। গুৱাহাটী মহানগৰীৰ নৰ্থ বৰ্মাত দিনযোৰা কাৰ্যসূচীৰে আজি পালন কৰা হৈছে মে-ডাম-মে-ফি। আহোম শসকলৰ এই পৱিত্ৰ দিনটোত ৰাজ্যৰ মুখ্যমন্ত্ৰী সৰ্বানন্দ সোণোৱালে ৰাজ্যবাসীক শুভেচ্ছা জ্ঞাপন কৰিছে।তেওঁ শুভেচ্ছা বাণীত উল্লেখ কৰি কৈছে-'জাতি,ধৰ্ম,বৰ্ণ নির্বিশেষে এখন ঐক্যবদ্ধ আৰু শক্তিশালী অসম গঢ়াৰ যাত্ৰাত স্বৰ্গদেউসকলৰ আশীৰ্বাদে আমাক পথ প্ৰদৰ্শন কৰক।' গুৰুত্বপূৰ্ণ কথা এই যে এই পূজাৰ জৰিয়তে উপৰিপুৰষসকলক স্মৰণ কৰি বিশ্বশান্তি কামনা কৰা হয়।