'আছু'ৰ উদ্যোগত দেওবাৰে সুধাকন্ঠৰ ৯৩সংখ্যক জন্মদিন পালন

নিউজ ডেস্ক:
বিগত বৰ্ষসমূহৰ দৰে এইবাৰো সদৌ অসম ছাত্ৰ সন্থাই কামৰূপ(ম) জিলা আৰু সদৌ গুৱাহাটী ছাত্ৰ সন্থাৰ সহযোগত দেওবাৰে উদযাপন কৰিব ভাৰত ৰত্ন সুধাকন্ঠ ডঃ ভূপেন হাজৰিকাৰ ৯৩ সংখ্যক জন্মদিন।গুৱাহাটীৰ দীঘলীপুখুৰীৰ পাৰত সুধাকন্ঠ ডঃ ভূপেন হাজৰিকাই জীৱিত কালতে নিজ হাতেৰে উন্মোচন কৰি যোৱা নিজৰ প্ৰতিমূৰ্তিৰ কাষতে বহুবছৰ ধৰি সদৌ অসম ছাত্ৰ সন্থাই সুধাকন্ঠৰ জন্মদিনটোত 'উদ্দীপনা' শীর্ষক অনুষ্ঠান  পালন কৰি আহিছে। এইবাৰো দেওবাৰে সুধাকন্ঠৰ প্ৰতিমূৰ্তিত বন্তি প্ৰজ্জ্বলন কৰি জন্মদিন উদযাপন কৰিব। এই কথা জানিবলৈ দিছে সদৌ অসম ছাত্ৰ সন্থাৰ কেন্দ্ৰীয় নেতৃত্বই।
ইফালে,প্ৰতিবছৰৰ দৰে অসমৰ বিভিন্ন বিদ্যালয়-মহাবিদ্যালয়ৰ ছাত্ৰ-ছাত্ৰীসকলক লৈ এইবাৰো ডঃ ভূপেন হাজৰিকাৰ জন্মদিনটোত সদৌ অসম ভিত্তিত ভূপেন্দ্ৰ সংগীতৰ প্ৰতিযোগিতাৰ আয়োজন কৰিছে। আছু নেতৃত্বই জানিব দিয়া অনুসৰি এই প্ৰতিযোগিতাত অংশগ্ৰহণ কৰাৰ বাবে অসমৰ প্ৰতিখন জিলাতে জিলা ছাত্ৰ সন্থা আৰু আঞ্চলিক ছাত্ৰ সন্থাৰ সহযোগত প্ৰতিযোগীসকলক নিৰ্বাচিত কৰা হৈছে।